新相機

我終於買左啦..
為免我自己再三心兩意，左諗右諗..
我決定今日放工去買相機啦..嘻嘻..
去之前已經決定左買邊一個啦..
格左幾間價錢都差唔多..
點知最後果間平HKD100..
另外居然仲有信用卡10倍積分回贈..
而且今日係最後一日添...加速我買既意慾...


千揀萬揀..

我最後決定都係買Sony RX100，捨棄了CanonG15..
等..等...等佢充滿電後我就可以影..靚相了..

煎‧紅衫魚

為"Canon G15"同"Sony RX100"惆悵中..
無錯我仍然為呢兩部相機而非常惆悵..
只係二揀一者，我都揀左咁耐呀..哎呀呀..

自從之前部電腦壞左攞去整之後..
原本裝左既所有軟件都無晒，我亦未裝返..
今晚終於裝番其中一個執相既軟件啦..
之前一直用緊舊版，新版版面唔同晒..
我亦搵唔返我之前鍾意既中文字體..鳴鳴..
搵唔返最終都係放棄啦..唔要中文字囉...

煎魚向來係我既弱項..次次都煎都甩皮甩骨..
今次我有個好廚具幫手，今次煎得好好..
煎得好靚..我好滿意呀..嘻嘻..

炆‧冬菇栗子排骨

我真係好鍾意瞓覺既..
星期六日放假時我都會好爭取時間瞓覺..
瞓醒食野，食完野又再去補眠呵..
我都唔知點解我可以瞓到咁多既呢..
不過我今日都有煮晚飯嫁..都算係咁啦..
炆了冬菇栗子排骨..美味哦..

打冷夜

星期六無意慾想煮飯..
唔想煮飯但都要食野架..
好耐無食過打冷啦..於是乎專登去食打冷..
天氣唔熱揀左坐向大排檔外面，風味十足哦..
我真係食得好飽好飽呀..大滿足哦..

然後我又行左去睇相機呀..鎖定了3款型號..
三個唔同牌子各有優點缺點..真係唔知點揀好..
所以最後都係齋睇仍未作出實際行動呀..
不過下星期一定要去買既啦..
雖然好飽但仍然坎去食甜品..好耐無叫呢個啦..

外賣魚生飯

近排樣樣野都加價，樣樣野都好貴..
睇報導好小食肆都因為被大幅加價而被迫結業..
而且周圍而家好像只有大集團才可以站足..
我地無可以選擇地只好揀連鎖店食肆了..
我公司附近最近開左間外賣魚生飯..
由於只做外賣不設堂食，可以慳番唔少租金..
經營成本減少下，外賣魚生飯既價錢變相更抵了..
第二次去叫了這個是全店最貴HKD88..好抵食..


第一次去叫了這個是全店最平HKD58..好平呀..

全店有過百款慢慢您揀呵，我每次都要揀好耐呵!!

 

 

煲‧淮山茨實湯

今個星期真係好，返三日工就可以放假了..
我最近好煩惱呀..因為用緊既數碼相機壞壞地..
我真係買番部輕巧輕便既數碼相碼相機..
坊間有好多唔少牌子同型號我揀..因為唔知點揀..
攪到我好煩呀...居然連發夢都揀緊相機...
星期五放工去街周圍行..周圍睇..
攪到好夜至返，毫無準備大少既消夜添..
於是乎我臨返屋企前去左24小時超市買料煲湯..
返到屋企11點開始煲..煲兩個鐘啱啱好呀...
點知煲完後，大少話約左人去宵夜打邊爐..
哎呀呀..

芫茜蜆肉米粉

我之前煲劇煲到凌晨三點幾..
我煲既劇居然係港劇..好耐未試過..
我知道套戲係真人真事改編而成..
真係令人感動，斷估大少都唔會咁樣對我..
重陽節原本約左大家一齊去拜山..
好可惜我臨時爽約，我知係我唔好既啦..
我繼續留向屋企，一個人的消遙呀..
為我自己而煮的，最愛的芫茜蜆肉米粉..
今次加了很多很多的芫茜哦..

一個人的自在

對於我黎講︰今日依然係假期..
同星期六日好像無咩唔同咁樣..
我一早決定今日會繼續躲在家..
繼續我一個人的自在呀..
我好鍾意一個人在家的感覺..
自由自在，又唔駛定時定去買餸煮飯
自己鍾意做咩就做咩..
自己一個鍾意食咩就食咩..
我鍾意煲劇就煲劇..鍾意瞓就瞓..
消遙自在呀..
足不出戶好彩尋日買左啲材料煮野比自己食..
雖然留向屋企唔駛捱杯麵囉..
為自己煮了碗烏冬麵..

點心友

星期六躲在家，一個人的快樂..
星期日起來時，被公主小妹邀請去飲茶..
飲茶既地方並唔係屋企樓下，抑或附近..
而係要專登坐車去，仲要都幾隔涉下..
公主小妹已經唔係第一次幫襯，之前已經黎過..
連味神都話好食，仲專登坐咁耐車去食喎..
呢一點係令我出動離開家門既原因..嘻嘻..

去到已經兩點了..是間專賣點心的小店..
點心上來時熱辣辣的哦..食左好多碟呀..

 

食飽飽之後，就去左市中心行個圈..
向被人慫恿下買了我人生的第一對跑鞋..
晚上八點半出發去運動場試跑跑..
雖然講去試跑，可惜我行路多過跑囉...


原本今朝早我話會煮飯比大少食..
不過因為我去左街街，結果無煮飯..
惟有臨時比煮個餐肉麵比大少補數..

HaPpY FrIdAy

我星期一攞左假呀..
所以星期五既我返工充滿住Holiday Mood..
真係好想好可以快啲返工呀..哈哈..
既然星期五咁開心，Lunch都要食得豐富少少啦..
同事建議去食喇沙麵..我又好耐都無食過喎..
於是乎我地去左食蝦麵店，在灣仔區算係幾出名..
我揀左食蝦濃湯底蝦豬肉油麵..好好味道!!!


放工後約左公主小妹去銅鑼灣行下..
去左和民攞飛要等幾十個，我地無無聊去左行傢俬店呀..
行完仲去食左食超平小食..熱狗+汽水$10..
汽水仲可以無限地添飲添呀..仲有好多小食添呀..


呢個特價素菜薄餅$5，今時今日的確好平既..

不過食完之後仲未飽呀..我地去食和民..
今次食左我最愛既刺身冷麵同埋和民沙律..

 

煲‧冬瓜湯

我今年決定打流感針..
其實我而家間公司好好嫁..
每年都安排免費流感針比員工打..
幾年前我打過一次之後病左，之後就無打了..
近兩年公司直程安排有關人士上黎公司打針..
我只要行出門口就可以打了..所以今年打左..
打流感針報告完畢..

前排同包嫲去左買盒乾瑤柱返黎..
今次買既比平時用貴價啲..嘻嘻..
於是乎我用左煲下冬瓜湯..
好可惜我覺得無咩味咁囉..
會唔會因為我唔係用LC煲煲呢..

蒸‧梅菜豬肉

星期一要返工..
最近開始有個新工作計劃做..
全日都要眾精會神咁睇啲難明既野..
我用左好多腦汁呀，真係用腦過度..
所以放工既時候已經覺得好攰既啦..
我前一晚整左梅菜蒸豬肉呀..
味神公主小妹話有陣臭豬味..
唔好意思..我又食唔到添..
有時，我覺得味神小妹都幾慘..
味覺咁靈敏..食親咩都覺得唔好食..真慘呀..

煮‧葡國雞

星期日晨早起身..
打電話比返完通宵既大少..
佢已經向度嘆緊早餐啦..
於是乎我以9秒9速度換衫落街..
但我就算幾咁快都快唔過大少啦..
我到時大少已經食完，但佢陪我食..
然後我地一齊去超市買餸返屋企呀..

食完早餐又買完餸返到屋企煲落湯..
之後我可以安心繼續去補眠啦..
每次問大少想食咩餸佢總係唔會有要求..
無要求都好既我鍾意點就點嘛..
唔似得我家哪位公主小妹..味神上身..
食親咩都話唔好食..煮飯佢食真係好有挫折感..
真好彩，我家大少味覺唔似小妹，真好彩呀..
很久沒有煮的葡國雞..放了很多薯仔但我同大少唔食的..
公主小妹話味道有問題..醬料同材料同以往都係一樣..
但我同大少都食唔出味道有問題喎..
真係唔知味覺問題發生係邊個身上呢呵....

小包濕平記

星期五晚上我同小包同床..
我地俏俏地Pillow Talking..
小包教我數1-10喎..哈哈..
[廣東話] 1 2 3 4 5 6 7 8 9 10..
[英文] one two three four five six seven eight nine ten..
[國語] 1 2 3 4 5 6 7 8 9 10..
當然有時小包都會數錯漏左一個半個..
我亦好識配合地偶爾也錯漏左一個半個..
睇下小包有無發現到，好彩每次小包都會發現..
當佢發現我錯時就好開心，咁話我錯呀..嘻嘻..
突然間發覺無曬聲..原來瞓著左囉..


星期六放假的早上..
被可愛的小包纏住要食麥當當..
於是乎一早起身(其實都係十點幾啦)..
出門口時已經係十一點幾啦..
小包嚷著要食shake shake薯條..
我照叫shake完之後小包話︰咁辣既..
噢..原來上星期係紫菜味..今日係芥末味..
但小包依然照食囉..不過食完又話好辣要飲可樂..
小包奸計得逞了..呵呵...
之後我地去左濕平呀..小包濕得好開心..
幾乎件件都話好...件件都話買呀...
試衫時，簡直係開心都爆登呀...
我仲幫小包揀左條牛仔褲，同我同款嫁..哈哈..

 

結果我地一次過買左7件咁多呀..
之後就輪到包嫲濕平啦..包嫲左揀右揀..
我同小包等左好耐呀...小包話不如我地影相呀..

煎‧雞翼

可能上星期放得太多假..
今個星期返工既日子過得好漫長..
好似返左好多日工都仍然係星期四..

我家公主小妹有幾味撚手小菜..
有次佢煎雞翼好食，我覺得佢好犀利..
因為佢可以煎到皮金黃色脆脆..
但裡面係全熟既喎..好厲害呀..
因為我每次都會煎燶既..但裡面又唔太熟..
唔知會唔會係因為我一直都係用豉油醃雞翼呢..
我學習公主小妹只係用雞粉醃..好成功..

炒‧芽菜炒魚片

小包留左一晚..
星期日朝早起身無準備早餐..
所以我就帶左小包落街食午餐..
我地食左魚旦粉，我同小包一齊分..
跟住又去左超市，又去左兒童樂園玩..
玩左好耐下，我估小包都有啲肚餓..
所以我帶左佢去麥當當食shake shake薯條..
點知麥當當好多人好多人排隊..
小包又話自己好攰要我抱，我梗係唔肯..
然後小包就扭計喊呀..扭曬計咁..
於是乎我出絕招話走唔食薯條..
小包就唔捨得..唔扭計囉..乖乖咁
可惜呢個過程好多人睇我地呀..
然後我地又為左瞓晏瞓而再一次扭計啦..唉..

夜晚，包爸黎接小包走，順便向度食飯..
包爸買左兩個榴槤做手順，可惜我唔食既...
榴槤我全家人幾乎都愛食，唯獨我同大少唔食..
今晚我嘗試食左我人生第一口榴槤呀..
雖然無我想像中咁難食，但我亦不愛此味道..

原本無打算包爸會黎食飯，無特別買餸..
唯有叫包爸自己斬料上黎加餸...
成餐飯淨係記得影左碟芽菜炒魚片..

小包愛上膠櫈

星期五晚收到包媽委託..
希望我星期六可以幫手睇住小包..
我都好掛住小包既..當然無問題啦!!!
包媽一早就帶左小包上黎我屋企啦..
梳洗過後，我就帶小包落街食午飯啦..
我問小包想食咩..飯? 麵? 包? 意粉??
小包竟然答我話食︰意粉喎..
所以我帶左小包去快餐店食肉醬意粉..
我地買完野之後，發覺全店滿位無位..
帶住小包捧住個餐，真係好麻煩既..
好唔容易搵到一個位，四人座位得番一個位..
經理見狀借出膠櫈比我坐，但小包爭住坐..自此小包愛上了這張膠櫈，之後有位小包都唔肯換..

因為正常既座位對小包黎講︰太矮了..
但快餐店的bb椅對小包黎講︰太迫了..而呢張膠櫈既高度對小包黎講︰啱啱好呀..
所以小包愛上了這張膠櫈...讚..讚..

煎‧三文魚

中秋假期後返工..
當然我地好想繼續放假啦..
不過一返工就已經係星期三都唔錯呀..
我家大少原本話唔返黎食飯嫁..
點知..突然間大少又話返左黎啦..
毫無準備下，我就唯有同大少去街食飯..
點知我覺得一啲都唔好食，仲好咸添呀..
我覺得我之前煎既三文魚好味好多呀...

好友出嫁

時光倒流回到中秋假期最後一日..
即係2012年10月2日，星期二呵..
今日係我好友茵茵既大婚日子..
睇住佢由無拖拍既小妹妹，變為今日出嫁..
真係好戥佢開心呀..嘻嘻..哈哈..
結婚儀式從簡，刪掉了朝早的所有禮儀..

我只需要直接去到觀禮既地點便可..
由於我同新人住同一個屋苑，我就可以坐專車去..
我家公主小妹臨時抽起條根話去觀禮..

結婚儀式選址在拉斐特證婚中心..
我第一次去，亦係我覺得去咁多間之中最好既..
可能因為新開關係，環境好新淨，亦無其他新人同場..
整個場只有我地一班人，加上觀禮人不多，感覺好好..

雖然婚禮過程係好短好短，好快已經完成..
我喜歡這種只有少少人參加的觀禮，感覺很好..
我知道新娘子好緊張既啦...總之，一齊都好好呀..

禮成後，我就同波波直接去酒樓啦..
因為我地被分配到接待既工作呀..
不過去到酒樓既時候只係四點幾...邊駛咁早接待呀..
酒樓場地係專做婚宴的，明顯有結婚既氣氛啦...
連鋼琴都有呀..我都係第一次見咋喎..
我大把時間可以趁無咩人時周圍影啦..
今天是個輕鬆溫馨浪漫既婚宴..
最後，我要再次祝您倆甜蜜幸福..白頭到老..