兌現‧清湯牛腩

當我買個LC煲返黎時我已經話要整牛腩..

一拖就拖左成半年啦，仍然未行動!!!
今日突然充滿想煮新菜色既心情..
於是乎我一於去街市買黎牛坑腩..
第一次整我既清湯牛腩..用我既LC煲整..
效果好好，連大少都話好!!!

今日小包在此，無時間打食譜，等我得閒寫番..紀錄下..
我的清湯牛腩食譜

* 牛坑腩1斤洗淨，放入滾水出水..

* 同時加入薑片3片及蔥段數棵入水，約10分鐘..

* 撈起再用凍水沖洗乾淨..

* LC煲下少許油，放入薑片3片，蒜頭4粒拍扁，放入牛腩..
* 贊入1湯匙米酒，再注入滾水至過牛腩面..
* 加入八角3粒，冰糖1湯匙(但太甜了，要減半)..
* 當水滾後轉至最小火，煮15分鐘，熄火焗15分鐘..
* 再開火煮15分鐘，熄火焗15分鐘..
* 再次開火放入蘿蔔件，及芹菜再煮15分鐘..

* 倒走薑片，蒜頭，八角，芹菜等唔要既野..

* 煲內只餘下蘿蔔及清湯煮滾，下雞粉及鹽調味..
* 取出牛腩切件後，再放入煲內滾起..

* 最後，將芹菜及芫茜切碎放上面即可..

我的No.50/100終於完成了，牛腩冧滑，但稍為偏甜了，下次有待改進..