彩虹蛋糕

大少投訴我將佢的惡行擺左上飛士卜，攪到個個見到佢都問佢攞野飲喎..

尋晚放工覺得自己好唔掂，仲有點發燒添呀..所以今日無返工留向屋企瞓左成日..而家好番啲啦..

前幾日同事買了近期大熱既彩虹蛋糕返公司，無人生日，無野慶祝，我地純粹為左食而買的..成個蛋糕由包裝盒，絲帶，同埋紙袋，都同平時既唔一樣，好精美...

蛋糕外內都真係好靚，令人睇到都覺得開心..有五層顏色，每層顏色味道都唔同既..以呢個價錢我覺得好抵食呀..

令人開心快樂既彩虹蛋糕..

 

包‧西洋菜餃

臨近農曆新年，點都要大掃除一下..

但一諗到要清潔，就覺得好攰啦..廚房..露台..大廳..房..廁所，諗要清潔咁多地方就覺得頭痛呀..公主小妹最近既格言︰我鍾意間屋清潔，但我唔鍾意做清潔...我覺得好啱呀..

於是乎臨時急急腳上網搵家務助理姐姐，原本約左下星期一既，因為星期六日很難約，而且平日會平啲，打算請一日假，點知星期五朝收到電話話阿姐星期一唔得閒改星期日得唔得，收費收返平日價錢..我梗係拿拿聲應承啦..

清潔日當然唔得閒煮飯啦，阿姐未黎前我整左西洋菜餃，係尋日整比自己同大少食既..不過仲淨左好多，今朝起身時再包黎食..即包即食..好味...

食完就展開清潔工作了，今日係全屋清潔日，請了兩位姐姐清潔..當然我都有份做少少咁啦...

早幾日大少話唔知邊個邊個..原本經營食肆但結業了，有好多飲品以批發價半價出售..但地點係西灣河，自己去車...大少講完之後計過數，我話邊有可能自己去搬呀，幾平都係假啦...

唔知大少用完啲咩方法，令到人地送貨送到黎樓下...唔慌蝕底既大少竟然買左咁多...我都唔知佢點飲呀...唔買唔飲，買左我又想飲..攪肥我呀..

滾‧茶瓜皮蛋芫茜湯

食了炸雞..有點點喉嚨痛..

我一向知道皮蛋芫茜湯是很下火的，我有時覺得自己熱氣時都會滾這個湯..但我從未曾試過落"茶瓜"，之前有朋友問我係咩呢時，我都唔知喎..

尋晚睇電視介紹了茶瓜，佢話味道好似熱狗裡面啲青瓜，但佢可以清熱氣..於是乎我今日去街市買了一包茶瓜..HK$2，味道原來甜甜的..我反而覺得佢似潮州店的咸菜味..

第一次下了茶瓜的皮蛋芫茜湯..

炒‧腸仔滑蛋

這星期工作.很忙..

除左工作忙外，我又忙於好好經營我既"糖果圖陣"嘛...哈哈...我尋日好似已經交代左啦呵..

公司附近最近新開了間冰室，喜歡嘗試新事物既飯腳同事，我梗係會陪佢去食啦...結果..一個特餐..半份多士+火腿炒蛋+兩隻雞翼湯意粉+凍檸茶，比華星多了兩隻雞翼，又唔係好食過人，但要HK$51...食完有啲覺得非常唔抵呀..炒滑蛋..我都得架..成本好低者..我以後都係去華星好啦...

今日董事長請食餅，我們的蛋糕陣容，澎湃..好味道..

煮‧蝦意粉

呢幾日經常都要OT..八點幾至放工..

最近我被人荼毒左，我成為左Candy Crush Saga既粉絲..我一得閒就玩..玩..玩..我等車又玩..返到屋企又玩..仲要等人送生命比我..

我之前成日話大少沉迷遊戲，我居然加入左戰團..攪到我晚晚夜瞓..成日都心思思想玩...哎呀哎呀..我要戒掉佢..

晚晚都要加班，無時間煮飯呵..上載之前的蝦意粉..

龍。開年火鍋

年初二!!開年呀!!

繼續祝您龍年大運，身體健康，心想事成，豬籠入水...

賺到盆滿砵滿呀...中六合彩，百發百中!!

今日有人到訪家中，相約打麻雀呀..

天氣真係超級寒冷呀，所以決定放棄煮飯..
在嚴寒氣溫下周圍打邊爐..真爽..
今日去街市買餸，蓮藕竟然HK$32一斤呀..
嘩..嘩..嘩...今日所有野都貴晒呀!!

包呀..包利是..

年廿九，兔年既最後一日啦!!

為左接迎龍年來臨，我同大少要開工..
係呀..開工包利是...工廠式地開工包利是..
大少唔係年年都參與包利是既工作..
難得今年佢有份一齊包利是!!
其實包利是係一個好嫌惡性既工作，討厭..
原本已經蹝時間既工作..
我家大少還嫌上年所包剩的利是封老土!!
然後堅持要逐執拆出黎再入再過...
我絕對覺得佢咁做係唔環保兼極浪費時間!!!
我真係無佢咁好氣呀!!!
包下包下..閒閒地用左成個鐘頭包利是..

煮‧茄汁蝦碌

從大澳之旅，我深深感受到電視劇既魔力..

我不停地聽到小朋友︰和諧..和諧..我會學習..

每一次合照時，二十幾位小朋友一致地同聲講︰茄子(國語發音)..

通通都係最近電視劇既對白，好彩我都有睇下，如果唔係我就真係唔知佢地講緊乜野啦..

從大澳返到屋企附近已經六點幾啦，但我至於覺得好攰呀..可能因為向船上面瞓左一陣，見自己唔太攰，於是乎，我走左去街市買餸，臨近收檔海鮮果然係平啲..比我見大大隻既跳跳紮既蝦..減價速銷呀..我最愛既蝦..

腦海中登時諗到..茄汁蝦碌...

大少︰點解您又煮蝦呀..(因為前晚煮左)
志太︰您唔係唔知我鍾意食蝦呀..
大少︰您唔係唔知我好懶食蝦呀..
志太︰超..咁您咪又係食..

其實食蝦有幾麻煩呀..何況蝦背已經被我開刀了..大少真係煩呀...

我的茄汁蝦碌食譜

材料

* 大蝦半斤
* 紅乾蔥三粒切碎


醬汁
* 茄汁兩湯匙* 喼汁半湯匙* 砂糖兩茶匙

(煮前先行試味，調啱至煮)


煮法

* 大蝦洗淨，剪去蝦觸蝦鬚..* 將蝦背界開，挑走蝦腸..
* 大蝦放入少許鹽及粟粉醃勻..* 熱油後，下蝦煎，兩邊煎至轉色金黃，取起隔油..
* 原鍋倒走多餘的油，下乾蔥碎炒香..
* 下蝦快炒兩下，將倒入醬汁快炒..
* 令每隻蝦也沾上醬汁便可了..

大澳遊

之前曾經透講過今年參與左公司既義工團隊..

今日又出動啦，今日係去香港漁村大澳..我咁大個人我都未去過大澳嫁..嘻嘻..我自己都好期待..好興奮呀...

我無隨大隊出發，我揀左向中點站屯門碼頭等大隊，由屯門碼頭坐船去大澳要一個鐘，終於到達大澳啦..由於我只係義工..主角係一班小朋友..社工安排了導賞員為我地介紹大澳既景色同特色..

大澳既特色︰"棚屋"同埋"曬咸魚"呀..

 

 

除左向陸上睇棚屋之外，我地仲坐埋導賞船沿海睇棚屋..然後仲出海睇中華白海豚...不過好可惜..我地睇唔到中華白海豚呀..睇唔到呀..但我學識左中華白海豚既學名叫︰"印度太平洋駝背豚"呀..記住啦..

食完飯之後..導賞員安排左一位婆婆教我地曬咸蛋呀..大家都可以試整下...我都有試過呀..不過我失敗左呀..我個蛋黃穿左呀..唔成功..我仲渣過啲小朋友呀...哎呀!!!
曬咸蛋既程序係..向鴨蛋上面打爛..取出整個蛋黃連蛋白放落水度..然後再用雙手抽起蛋黃..不過唔係全部蛋白都要抽起嫁，因為有一條係臍帶，如果抽走左個蛋黃就會穿既啦...我諗我就係咁穿左..抽出蛋黃之後曬上少少鹽..曬三日就得既啦...
婆婆好好人呀..仲每人送左一粒咸蛋比我地添呀..我會用黎蒸肉餅...嘻嘻..

 

整完咸蛋之後，我地就去左另一位街坊的棚屋，婆婆教小朋友整白豆粥，係用將幾種豆磨碎再煮粥，味道甜甜地，好似豆漿味嫁...不過唔岩我口味..因為我唔飲豆漿既..

下午四點..我地就走啦，坐返船返屯門碼頭，一小時既船程，我已經覺得很攰了，但班小朋友依然充滿活力..

雖然我係義工姐姐，但我覺得我自己都獲益不少呀..而且我仲向同事推薦下買左樽蝦醬..

煮‧咖喱雞

今日終於唔駛返工啦..可以瞓..瞓..瞓...

我尋晚同大少出街食完飯，我就去超市買嘢，買埋今日要煮既餸，咁樣我今日就可以完全留向屋企，可以唔駛落街啦..嘻嘻..我真係醒啦!!

買左兩隻雞肶返黎，用左一隻黎整大少要求的鹽焗，另一隻就用左黎煮咖喱，咖喱汁膽係我尋日午餐剩低既，我只係加啲雞肶落佢..再加埋油酥餅，真係非常之..好味..不過油酥餅只我食..大少唔食..大少食飯的..

然後一個人睇大結局了..

鹵‧鹵雞腳

最近工作非常..很忙呀..

尋日我差唔多十一點至放工呀..返到屋企已經要瞓覺囉..

工作這樣忙，煮鹵味係非常好既選擇..反正，雪櫃仲有一兜鹵水汁剩低..一於唔浪費鹵鹵吧..

我覺得我既腦汁已經被公司榨乾了..係腦汁..而唔係我兜鹵汁呀..哈哈..

很累了..

蒸‧鹹蛋肉餅

我今日無返工呀..

原本今日有啲野做所以一早請左假，之後我又將件事交左比另一個人去做，所以我就得閒左啦..

無端端放假可以瞓得飽飽先起身..然後好梳乎地行去嘆左個下午茶..我有時去食下午茶，其實係為左杯凍檸茶..幾日唔喝就有啲想飲..其實呢幾年已經飲少左好多，但始終有心癮..

五點鐘買完餸，我知道返到屋企大少會霸住部電腦我無得用..我只好醉心在廚房煮飯好了...於是乎..我今晚剁肉餅..由一嚿豬肉剁至肉餅..整火山肉彈呀...哎呀..見今晚有時間嘛..

今次係第二次整呢個火山肉彈，今次嘗試將鹹蛋白放入肉餅內同醃，諗住唔好浪費嘛，但好似唔落好啲...下次都係蒸前至倒向上面就數啦!!!大少食既時候話..點解面果層凍左既..大佬呀..蒸完攤凍左囉..又唔係蒸完即刻食..=.="

聽日..又要返工了呵..

炸‧芥末沙律蝦

我今日有返工呀..

上星期五收到小包的電話..佢話唔想寫字呀..問佢點解唔想寫字..佢亂答我一通..然後我告訴她唔讀書唔寫字，每日留在屋企瞓啦，無得玩玩具，無得落街玩..跟住..小包話我會乖..聽話..比心機既啦..

今晚再打電話比小包..
志太︰您..向度做咩呀..
小包︰我向度..食瓜子..
志太︰吓..食瓜子??
小包︰唔係呀..我寫緊字呀...
哈哈...我真係聽到食瓜子嘛..都好..寫緊字!!
小包唔想寫字，係唔係就好似我唔想返工呢呵..

有時我都想可以唔駛返工，留度屋企..哈哈，但我仍未中六合彩呀..

繼續努力..

星期日從雪櫃找出一包雪藏蝦，整了這個芥末沙律蝦，很久沒整了..好味..

鹵‧雞翼豆腐

今個星期六返左工，感覺好似無放過假咁..

星期日懶我就懶啦..留向屋企上上網，瞓瞓覺，唔駛落街買餸，真係舒服呀..雪櫃長時間不時有雞翼的存貨，真係好方便我呢啲懶人呀..

食完飯留在電視機前睇頒獎禮..真係唔好意思..大部分歌我都未曾聽過..有啲人都唔識添呀..

北上一轉

這裡幾天沒有更新了..因為很忙嘛..

剛剛的星期五六，去了深圳公幹一轉回來..無錯..連星期六也要工作，對於我這些習慣了五天工作的人，真的覺得有點兒辛苦呀..慶幸，當工作時候，時間于知不覺地過得很快了..

今次的食宿安排很好...工作得很愉快呀..由於上次入住的酒店有同事有點微言，因此今次負責的同事不敢怠慢，連帶我也有所得著呀..今次的酒店真的比上次好很多很多呵..



酒店房真的很大，有廳亦有廚房，跟香港住的屋真是只差少少者...還有很大很大張床..一個人住只是瞓了幾粒鐘便要起身工作了，好像有點兒浪費呵...我一瞓就瞓到天光了呵..

 

我一瞓就瞓到天光了呵..望出外看到初日，感覺良好呵..精神..




雖然酒店沒有包早餐，但我們還公費地食了早餐，比起上次好很多呵...



日本上司帶了我們去一間日本餐廳，相信只有佢地日本至搵得到，短短的一小時午餐時間，食了這個炸雞便當，真的好好味呀...人民幣50..抵食..

 

北上回來經過上水火車站，第一次親眼睇到水貨團隊的陣容..真係好犀利呀..勁呀..

北上一轉回來，一如以往返到屋企第一件事就係瞓，唔知點解每次我都覺得好攰..大少覺得我係去..擔泥..哈哈..

LC煲‧煲仔飯

星期六放假啦喎!!天氣已經沒有那麼冷了!!

這個星期六日決定留在家休息休息..
不會出外了，星期五已經做好這個決定..
星期五放工時已買定點東西回家..準備今日煮..
自己一人的晚飯，順便留埋比大少回家食消夜..
我決定用我的20cm LC煲煲煲仔飯..第一次用這煲..
原來真係很好很好，有飯焦，但不會黏鍋，很易洗!!

大少說好吃，不過消夜吃這個太油膩了..

煎‧蓮藕鯪魚餅

星期日了，假期很快又完了呵..

最近某超市正在換LC產品，好可惜我連最低資格的積分亦未儲夠呀，我心目中想換焗盤呀..之前去開倉時只有啡色，所以無買到，今次原本打算換..點知..唉..無望了..

上次整左蓮藕餅比我家大少試食，大少讚好，我自己都覺得唔錯呀..我認為係叮餸既好選擇之一，所以趁今日假期有時間，再整多次等我家公主小主同姑丈哥哥試下嘛..

今次我改左用鯪魚肉取代墨魚膠，同時亦加多了份量，同埋蓮藕碎..好彩今次公主小妹無彈我..我諗應該係幾好啦..星期日多人一齊食飯，煮了五個餸呵...看看後面幾澎湃呀...

釀‧魚肉茄子

放左咁多日假再返工，講笑..真係有啲唔習慣..呢個禮拜，我有強烈既唔想返工既感覺呀..唔想還唔想，始終依然係要起身返工既..好彩返三日工就可以再放假啦，真好!!!下個星期就死梗啦..
星期六的日子，一貫地懶洋洋咁呀..不過我都有去買餸嫁，我最享受係煮兩個人既晚餐，即係我同大少兩個人食，因為我可以全權話事煮乜野，我想煮乜就煮乜..兩三個餸又唔駛煮好耐..
我可以慢慢煮，基本上大少唔會催我煮飯，只有我煮好後，我催大少食飯，幾點鐘煮飯食飯都係由我話事，感覺良好呀..
今晚我整左..魚肉釀茄子..這個擺法幾靚呀呵..

煎‧菠菜肥牛卷

二零一三年第一日..元旦日..

媽媽通知我..原來係我既舊曆生日，咁快又生日啦喎..哈哈..

我今日都係留度屋企休息了，因為我聽日又要返工了，十一日既假期話咁快就完結啦..哎呀，放假既日子點解會過得咁快既呢呵..

我今日試了整菠菜肥牛卷，點知菠菜唔夠添，臨時用左泡菜頂上，我就覺得泡菜好食啲，好可惜大少唔食泡菜既，我下次都係要自己整比自己食囉..





大少今日失驚無神咁買左個蛋糕返黎比我..哈哈..真係稀有呀..

呢個假期裡面，我趁有機會整左幾個新菜色..總算幾滿意呀..