煎‧蓮藕餅(碎)

星期日小包仍然未走，包爸夜晚會黎食晚飯再接小包走..

早上起身趕及食早餐既時間，食小包喜歡既火腿通粉，跟住我地就去左樂園玩啦，屋企附近呢間好細，其實無太多野岩小包玩，但小包依然玩得好開心..好開心...

原本包爸話今晚出街食飯，不過我認為不如向屋企食啦..所以我就去左買餸準備晚餐...

每次我咨詢姑丈哥哥意見時，哥哥經常性會提議整煎蓮藕餅..證明佢係好鍾意呢個餸既..一於咁決定啦!!呢個餸整左好多次，成功既機會率係好高既，但今日竟然失敗左...

小包睇見我煮飯，就好想參與一齊煮，小包負責攞啲已經搓成圓型既蓮藕餅，然後壓扁再攞比我...叻女呀..

但我第一次批失敗左，痴曬底，我諗因為隻煎PAN既原因啦，失敗左無奈地將佢炒碎，變成左炒蓮藕餅碎囉..

之後再煎第二批，有少少過火了，但都唔差，小包讚好味，仲食左兩塊添呀...

 

炸‧肉丸

一星期沒有更新過，唔知有無人掛住我呢..我估無既啦!!

星期五晚臨時地決定帶小包返屋企渡假，一個非常臨時既決定呀..

星期六小包早上八點幾就已經起左身了，小包話平時七點半就要起身返學既啦...但係今日係星期六喎..小包叫極都唔多願意繼續瞓，我萬般無奈不願地起身..

梳洗過後我帶小包去食豐富既早餐，然後去會所玩，呢個鐘數會所唔太多小朋友，會所比公園我亦放心得多，可以讓小包自由奔放咁走黎走去，我又唔駛人釘人咁昅住...

我原本答應小包帶去樂園玩，小包滿心歡喜地攞袋銀準備出發，點知呢間執左，我都知小包會好失望，所以專登抱住小包一齊去問管理員，從管理員口中講"執左"，說服力勝萬倍，小包亦好明白事理，唔扭過計..繼續行街..

今次渡假我整左炸肉丸比小包品嘗，小包都讚好味嫁...

煎‧素菜腐皮卷

自從大少返左新工後，已經好少好少留屋企食飯了..

因為大少公司提供給員工的膳食的出品實在太好了..我也可以懶得去煮了..

我又因為無煮飯，所以我又減少左我寫卜既興緻，因為我無煮飯又無乜話題要寫了..

我無乜機會要煮飯比大少了呵..今晚我可以煮飯比公主小妹食，可以煮下飯...所以整左公主小妹鍾意食既野..

整左素菜腐皮卷..

我的煎素菜腐皮卷食譜

材料

* 腐皮1張
* 紅蘿蔔2條刨絲* 乾木耳絲* 銀芽半斤
* 杏鮑菇1條* 鮮冬菇數粒


煮法

* 紅蘿蔔去皮刨絲..杏鮑菇及冬菇切絲..
* 乾木耳絲浸軟瀝乾..* 銀芽白鑊炒軟，撈起待用..
* 下杏鮑菇絲及冬菇絲炒軟，撈起待用..
* 再紅蘿蔔絲及木耳絲炒軟後，下其他材料同炒..
* 下鹽及雞粉調味後，倒入篩子瀝乾水..
* 腐皮剪走周圍硬既地方，分成三份..* 放一片腐皮，放上材料，兩邊摺埋卷起，以生粉水收口..
* 熱油後，下腐皮卷慢火將一面煎至金黃色後..
* 再反轉煎另外一面煎至金黃色便可..

 

拌‧薯仔沙律

星期五放工後接了小包來我家渡假..

星期六我們帶了小包一齊去食日式放題，如果身高超過100cm便要比錢HK$98，結果量完後，小包而家高107cm，所以要比錢了...

自從上次小包食完三文魚刺身爆火後，小包話以後每次只可以食一片三文魚刺身，果然，小包真係記住呢個承諾，真係自我控制只食了一片咋，真係乖女啦...

上次食放題時，小包食了一款小食︰土豆沙拉，我當時揚言我都識得整啦..於是乎小包就話下次黎我屋企時要一齊整...小包仍然記住...

為兌現承諾，我尋日去左買薯仔沙律既材料，今日開工同小包一齊整既薯仔沙律...

在製作過程因不小心打爛了一半材料同埋一隻碗..同小朋友一齊整野食真係要小心點呀...

首先我先將薯仔去皮烚熟，再將雞蛋烚熟，然後待兩者放涼後便同小包一齊開工製作啦..小包用的是外賣膠刀..


1. 首先，小包將雞蛋切粒粒，青瓜則由我負責..

2. 然後，小包再將火腿切粒粒，個樣好認真，好努力嫁..





3. 小包再已烚熟既薯仔壓爛..

4. 最後，將所有材料放入薯仔泥內，加入bb沙律醬..

5. 大功告成，我們的製成品"薯仔沙律"(即土豆沙拉)..

6. 小包好滿意我們的製成品，第一啖比左包爸試食..

蒸‧咸蛋肉餅

我既假期已完結了，回來繁忙的工作日子了..

離開工作多年熟悉的工作環境，真係要有很大的勇氣，我家大少亦開始他的新工作生涯，但願一切順利啦...

離開舊公司時，一班舊同事為大少舉辦了一個令人感動不已的歡送晚會，原來我家大少既人緣都幾好，唔走都唔知呀..多謝亦感激大家帶給大少的感動...

在我過去的假期中我只有一日有煮過飯，其實唔係我懶，而係大少有太多歡送活動要去者..

煮了這個咸蛋蒸肉餅，改變了一貫火山造型，這次是扁扁的...

煎‧蔬菜墨魚餅

當大家已經返工時，我仍然正在享受我第五日假期..[奸笑]

我家大少亦每日地享受他的活動，離開他公司的小粉絲們呵..一大堆活動排隊等他嗎..哈哈..我就已經追一套韓劇了，唔想再沉迷下去，所以我決定唔再揀新既一套開始..

整個假期都無煮過飯，今晚終於下廚了，整左蔬菜餅..呢個概念係我之前上網時睇過而考慮整既，至於是出自誰之廚房我就唔多記得了呵...

粟米超級甜呀，我覺得好味呀，簡單又好味..

我既100道新嘗試還記得嗎，這個是No.80/100，仲有20道呀，加油... 

我的煎蔬菜墨魚餅食譜

材料

* 墨魚膠(現成的)
* 紅蘿蔔半條刨絲* 芫茜數棵切碎* 粟米半條


煮法

* 粟米隔水蒸5分鐘，取出起粒..* 紅蘿蔔刨絲，芫茜切碎..
* 將所有材料放入大碗內，放入鹽調味..* 以同一方向攪勻，放入雪櫃雪一小時..
* 取出後分成相等份量的..
* 先取一份量，並用雙手揉成圓波型，再按扁...
* 熱油後，下蔬菜餅慢火將一面煎至金黃色後..
* 再反轉煎另外一面煎至金黃色便可..

煮‧媽媽的麵線

我正在享受我第三日假期了..

我家大少亦開始享受他的假期了，他一大堆活動要出席，都應該既..

大少雖放假但比我還忙，同我飲茶已經是萬幸了呵..大少有活動，我亦仍然繼續我糜爛既假期生活..唔煮飯..鍾意時瞓，自然地醒，追劇去..今個假期是韓劇天下呵..

之前突然很掛念媽媽煮的麵線，試學煮，可惜不是這味兒..

拌‧西芹涼拌

返了兩日工仍然地忙，估計我仍會繼續忙下去..

付出得多不代表有一定好的回報，只要不抱著希望便會使自己開心一點呀..

今日發現原來我已經很久沒有準時地坐在家中睇0830的電視劇集了，今天也只能睇得到0930的電視劇直播，而非上網睇..

在忙碌既日子，我突然決定攞了兩天假期，來一個五天長假期休息下..打算宅在家..今天係第一日假期既開始..

但原來今日大少放假喎..哦..哦..我真係唔知道喎..忙得太耐無溝通啦..哈哈..放假既大少要求去買鞋喎..

好耐好耐都無煮飯了，打算趁放假煮飯卻被大少拒絕了，想我休息下喎..我要求大少陪我食我鍾意食既..大少唯有不喜歡地陪我食..我要求的薄薄的薄餅呵..

呢一排無論係放假時，抑或加班都食左好多野..所以要整個清淡既素菜調節下..

 

北上復活節假期

整整一個復活節也沒有更新過..

一連四日既假期沒有宅在家，反而有很多節目沒有在家，日日往外走..

有兩天雖下著大雨但沒有改變一家人北上既興緻喎..節目係食..揼骨..買野咁啦..

包爸帶了我們去食日式放題，人民幣150位，都唔錯嫁，三文魚腩好肥美，亦有任食海膽呀..每樣野都平均好食既..

小包很喜歡食三文魚刺身，搶住要食，誰人叫也不肯不吃，結果食了幾片啦..小包愛食既樣子真係好可愛呀...

晚上小包不停地話自己好熱，個肚要爆火啦，大家都不以為以，以為小包因為熱而已，包爸還問小包要不要食雪榚添呀...姑姑就叫小包飲水啦，小包話要飲冰水至得喎，飲溫水唔得嫁，但結果無飲已經瞓著了...

結果小包瞓到半夜突然間嘔，當時我不在現場不知道實際情況，因為我在隔離房忍痛地通淋巴...痛..痛..痛呀...

第二朝小包主動告訴我尋晚佢嘔，所以弄濕了頭髮..我還笑小包的頭髮有三文魚味添...小包話︰係喎..小包主動地話要洗頭(平時小包唔鍾意洗頭嫁)...哈哈...

自此小包話每次只可以食一片三文魚刺身者...唔知下次仲記唔記得呢..係唔係真係會自制住只食一片呢呵...

復活節假期最精彩部分報告完畢..