睇戲

今日好難得地大少同我去睇戲...

其實係免費戲飛唔駛比錢，係同事所贈既..本身對呢套戲都有所期待...

大家同影評都話好感動，還會喊添呀....但係...我同大少睇完之後真係一啲都唔覺得感動，完全無感動既地方...我覺得情節好慢呀...

直到呢刻我完全無買過任何bb既野，一樣都未買過，亦無任何詫欲衝動買野喎...身邊既人都比我緊張喎...

懷孕 @ 預產期證明

而家已經懷孕27週了，今日再去產檢...

上一個月重左8磅有多，好誇張呀...今次再磅一個月只係重左1.2kg，少上次一倍有多喎...

今日醫生有交代如果下星期開始覺得唔舒服就要直接去產房啦...突然間覺得好快要生咁播...

我開始安排我係產假了，公司最少要攞預產期兩星期，經過一輪計算後發現政府既預產期係最好既...>>政府同私家其實只係差三日者<<<

根據政府既預產期計算..啱啱各農曆新年後開始放....然後，復活節前返工，時間啱啱好...

所以今日去政府產檢時，一定要攞返政府既預產期證明呀...

慶包媽生日

今日係小包媽生日呀...

原本我地打算出街食既..不過包媽話不如返屋企打邊爐啦...

結果辛苦佢自己去買材料，同埋洗野添...今餐真係真係好豐富呀...仲買左象拔蚌添呀...我都有食嫁...灼一灼咪得囉...真係好鮮甜呀....

全晚最攪笑係小包最後堅持要送我地出門口，我地入左電梯後，小包仲問我地"識唔識搭港鐵呀"...真係笑死我....

第一份禮物呀

上年有幸可以去日本研訓..好彩偏偏係上年...

如果係"前年"或者係"今年"，我就無緣可以去啦...

今年輪到我同事去...真係戥佢開心呀...我都好開心呀..因為佢買左份手信比bb...

bb收到既第一份禮物呀...

煎‧釀茄子

自從懷孕之後，我已經好耐好耐無煮飯啦....

今早做食早餐時，我突然間好想食煎釀三寶..屋企附近無乜好食既煎釀三寶，想食呀...唯有自己落手落腳整啦...

其實都唔係好難者，自己整應該比街買的健康少油啦...

懷孕 @ 想食龍蝦

我好想食龍蝦呀...自從大肚之後我已經好想食龍蝦...

一直都忍住，但呢幾日真係好想食呀...同大少講後，佢又無反對喎...仲打算安排流浮山海鮮餐比我添呀....不過點知訂位時得兩個人，布價HK$1500呀..嘩...我只係想食龍蝦者....

結果我放棄了流浮山，我求其去左間酒樓，點知我想食既澳洲龍蝦呀..只係得細細隻既波士頓龍蝦..唯有照叫啦...

我自己一隻食曬..我食完兩邊龍蝦肉..剩餘龍蝦腳，我話賞賜比大少食架，不過大少話唔要喎...

終於算係食左龍蝦啦...

懷孕 @ 血糖測試

而家踏入第25週了..肚開始明顯了，身邊的同事開始發現了...

今日安排了做血糖測試，未去之前身邊有經驗既人，已經同我講︰好難飲嫁....我已經有定心理準備...

九點鐘空肚唔可以食野，去到醫院唔駛排隊優先可以抽血了...抽完血就去飲糖水...

懷孕 @ 第二次結構檢查

2013.10.24. 又一次的產檢日子，今日係第二次照結構...上一個月已經照了一次結構了，不過當時bb各方面的size都屬於最高水平，與我的預產期似乎不符，所以安排一個月後再做多一次..

懷孕 @ 口味

今個星期五，公司聚會各同事揀左去食自助餐...

而家懷孕23週既我，眼見大家暢快咁食生蠔，長腳蟹，刺身...我得個睇字..無得食..

我只係食熟野，食得真係唔係好多..我真係覺得唔係幾好食喎.我覺得我既五百幾蚊係浪費既...

自從懷孕開始，我嘔吐情況唔嚴重，嘔既次數十隻手都數得曬呀..不過朝早一起身既晨嘔到而家仍然繼續持續...每朝依然嘔呀..

我既口味亦沒有特別唔同，沒有特別什麼以往食變得唔想食，以往唔食既而家仍然係唔食...無咩變..

我都沒有特別戒口，大少只係叮囑我唔好食食魚生..奶茶咖啡都無飲..其他野我依然有食，我依然忍唔到就係可樂同埋凍檸茶呀...當我忍唔住時都會飲下...

懷孕 @ 衣服鞋襪

懷孕22週了，外表變化唔係好大!!

我平時著既衫都偏鬆身，所以仍然可以繼續著，未需要特別而去買，仲可以繼續著...

反而，平日返工對鞋就有少少緊，可能因為尖頭既關係啦，波鞋仍然著到呀...於是乎買了兩對新鞋返工，買了比平時大一個碼...

 

懷孕 @ 大少做家務

同事成日都叫我好好享受懷孕呢段時間..

好好咁食多啲野，不過我胃口唔係咁好..食量比之前還差..好好咁享受大少既服待，不過大少無乜特別對我好喎..最多咪係買野食比我食咁啦...不過有時都會唔騷我嫁...

不過最近大少就勤力左做家務喎..大少居然主動洗冷氣...又主動抺地...唔駛我叫佢，佢自己主動做...算係乖啦...比個讚佢啦...

懷孕 @ 終於出動

原本尋日放工約左大少去買大肚褲，不過放工前突然落雨呀，大少就唔批準我去啦，我唯有乖乖返屋企啦...落雨的確唔係咁適宜去街既..

星期六加上大少今日放假，當然大少唔因為我大肚而專登早起，大少依然瞓到日上三竿，我就自己食左早餐先...三點鐘大少終於起身啦...

跟住我地就搭的士去食車仔麵啦..[無錯呢個行程似曾相識呀...因為大少放假經常發生]..

今日算係自從我懷孕後，在唔駛返工既日子，第一次出街行..我同大少行左一陣，食埋晚飯至返屋企...我話想食壽司..

打邊爐呀

我每日突然間好想打邊爐呀..

加上大少今日放早，可以一早放工，打邊爐叫埋妹妹同哥哥一齊食，可以食多d嘛...

原本大少話出街食啦，唔駛買又唔駛洗，但我覺得向屋企食經濟d，抵食d，野食可以新鮮d..質素好d嘛..

結果我一個人推左架車仔去街市買野，因為地滑我差d跣低添，好彩無事咋..

美味又滿足既一餐呀...

懷孕 @ 產檢

懶了一星期沒有上網了，我又懶得更新網誌了..

懷孕後從沒有寫過產檢的事宜，再唔寫低我相信我會唔記得既啦...嘻嘻..

由8月8日至9月26日體重並重了3kg...原本稍高既血壓亦稍稍回落...

朋友們知道我產檢的情況，大家都說我很幸福舒服，之前她們每次去醫院做檢查都起碼要三個鐘，等得時間很長，但因為今年無左雙非，所以少左好多人，唔駛等，亦無迫爆，真係好!!BB真係識得揀時機...

而家已經20週既我，轉左食Materna..

小包生日快樂

小包5歲生日啦...生日快樂呀....

小包生日適逢係公眾假期，大家都唔駛返工，可以周小包一齊慶祝生日啦!!

其實所謂既慶祝，只係買左個生日蛋糕者..其實無咩特別既...不過小包都絃幾開心呀..

唱生日歌既小包，小包叫我地唱細聲啲，等佢自己唱大聲啲，到唱中文版既時候，小包叫我地唔好唱，等佢自己一個唱喎...哈哈..小包知唔知其實係佢生日呢呵....

買蛋糕時，小包要求姑姑買埋糖果燭，因為有五枝，岩岩可以配合小包5歲插5枝，所以姑姑就破例買埋去，下年就唔得啦...

希望小包身體健康，聽教聽話啦啦...

中秋佳節

中秋節快樂呀...

自從出院之後，我便回了娘家過住休養生活..有媽媽照顧我既起居飲食，我唔駛下下食外賣了...

適逄今日係中秋節，小包只係返半日學，放工後就直接黎包嫲屋企啦...一入門口就同人講︰中秋節快樂呀..真係識做啦..今天返學係玩既，小包手揸住一嚿由麵粉做既月餅..仲攞番之前姑姑幫佢做既中秋燈籠功課添...

今年中秋燈籠功課既主題係太空，我今年無份參與過，由姑姑一手包辦的呵...都幾好呀...

因為今年在小包帶摯下，已經多年中秋沒有去過公園的我今年亦出動去了公園..之前的燈籠壞了，臨時買了個新燈籠比小包，睇下個燈籠同小包差唔多大咋...哈哈..還有螢光棒，小包同小朋友似乎鍾意玩螢火棒多過燈籠啊...

懷孕 @ 住院

剛剛踏入懷孕18週既我..感冒未好之餘，因為身體不適而入院了...

星期一下午在工作中途不適，自己坐的士到急症室睇醫生，在分流區報告自己正在懷孕中，真係好快，唔駛5分鐘已經有得睇了...在急症室內初步聽了BB的心跳聲，摸肚..跟住就安排入院了...

要入院已經有心理準備，但沒有任何物品準備，入院不是第一次，但之前兩次住院經驗都是私家醫院，政府醫院倒是第一次呵...不過都無辦法了...

等得最耐係向急症室內等阿姐黎接症接我上病房..上到病房坐位是窗邊位，環境都幾好呀...跟住就再見初級醫生，問症，聽心跳，摸肚及婦科檢查...之後又有一個高級醫生再之問症，摸肚...攪完所有野已經六點鐘了..

探病時間係六至八，面對我突然入院，媽媽無聽電話，大少返緊工，我就自己去餐廳食晚飯，渡過一個沒有人既晚上吧..等待第二朝做超聲波檢查...

第二朝早七點鐘已經有姑娘黎聽心跳，八點幾已經有醫生黎做超聲波檢查了，報告上各項都屬正常，我一心以為無事可以出院了，好可惜被醫生要求多觀察一晚，無辦法啦，唯有繼續留低啦...請媽媽攞啲正用品比我...在醫院既日子的確係好沉悶唯有既娛樂係睇雜誌..因為電話無電唔可浪費...

第三天早上七點鐘已經有姑娘黎聽心跳，之後醫生巡房，批准我可以出院了..由於準備文件需時，又唔知幾點至可以出院，所以我就無叫任何人黎接我，自己坐的士回家吧..反正我也沒有太多既行李，最重係啲雜誌者..

住院三日兩夜，我發覺這政府醫院不比私家醫院差喎，這裡環境地方好乾淨，姑娘好好人，連阿姐都好好人喎，一間房得一半病人而已，比私家醫院還寬鬆，又有限制探病時間唔似得私家醫院經常有好多人黎探病，這兒清淨得多了...

唯一的缺點是這兒不能似私家般隨時叫外賣送黎床位，下下要自己去餐廳食，不過呢個亦係我可以起身行下既大好機會呀...

我之前已經排左期在這間醫院生，有了今之經驗我可以好安心放心在此醫院生了...

最後，我仍然在放假中，下星期一才返工，但我一切安好，請放心!!!!

懷孕 @ 感冒了

懷孕正在17週既我..這幾天感冒了呵...

身體周圍的媽媽級都叫好唔好食藥，等佢自然好返，即係睇醫生都無用啦...連大少都叫我瞓多d..唔好食藥...我要靠我既意志力打低d感冒既病菌呀...

所以這幾天留在家休息，我的假期已經變得所剩無幾啦..

我周圍問人可以食啲咩可以快d好番嫁..大家都係瞓多d..喝多d水咁啦...

偏偏我向病既時候瞓唔著呀..平時好瞓得既我輾轉反則瞓唔著呀...真係慘..

水飲得太多好悶既...所以我有時會飲檸賓..檸檬+利賓納，當然係熱既啦...希望我可以快d好返啦...

甜‧雪耳龍眼糖水

休息左兩日又要返工啦...返工既日子真係比較攰，七點鐘起身，八點幾至放工返到屋企呀...每日食完午飯，總係覺得頭痛..如果可以午睡就好啦..

早兩日小包喊住咁打電話比姑姑，話比爸爸打喎..原因係因為佢唔識串英文字..

然後，仲靜雞雞咁問姑姑..英文生字點串喎...問左Orange...walk..run啦!!真係搞笑呀..

不過其實而家啲小朋友真係好慘喎，讀幼稚園已經要學好多字，串好多字，寫好深既字...回想當年我地讀幼稚園邊有咁多壓力呀...開心得多啦...

今日突然間想食雪耳糖水，出面賣的通常係配木瓜，不過我唔食既...所以我唯有自己煲啦...其實都好簡單者...

紅棗雪耳龍眼糖水...好滋潤既..最近總想食糖水呵..這個很好呀...

煲‧海底椰湯

自從大少知道我懷孕之後，當然無好似電視劇啲男主角咁樣興奮，叫我咩都唔好做啦...

大少更加無叫我唔好做家務喎...我仍然要做家務呀..洗初掃地呢啲簡單既家務囉..大少話我要做多啲運動喎....>唔想幫我做既藉口者<<<

大少做多左既係陪我食早餐，係呀，自從懷孕後，我已經唔可以瞓到日上三竿啦..基本上，我八九點就要起身食早餐啦...最多係食完再瞓過囉..

之前我比較攰，我就唔想落街，通常係大系買返黎比我食多既...隨著日子漸漸過，我亦比較精神，而家就通常會落街食..

食完之後就會去超市順便買野返黎煮..由大少負責拎，我就可以唔駛拎重野啦...通常星期六日都係咁樣過...我似乎與"去街"一字絕緣了呵...

包嫲去了桂林旅行，包嫲叮囑我放假時自己要煲些豬骨湯喎，可使寶寶骨格好啲喎...於是乎我今日有煲湯呀...

紅蘿蔔海底椰湯..唔錯呀，我食湯，大少食湯渣囉...

蒸‧清蒸豬肉

終於終於可以黎到星期六啦..

可惜今日我家大少唔舒服喎...

而家既我已經四個月了...一切都比較穩定了呵..

所以我今日下廚煲了白粥比大少食...我都有份一齊食..

食白粥，我整左清蒸豬肉..清蒸..比較清淡嘛..

清蒸係咩都唔落，只係落最基本既生抽，糖，水...

呢個係媽媽煮既味道..

唔見左...銀包

我今朝早癲左呀...

我今朝早起身時拎袋出門口，發現我個銀包唔見左....

尋日因為頭痛不適無返工，下午我就落左街食野，同埋去超市買左啲菜返屋企...由於落街同返工係用唔同既袋..今朝打算將銀包鎖匙放入返工袋..發現銀包唔見左...

我不停反轉曬兩個袋..不停搵，不停搵..之後，衝入房叫醒大少，問佢有無攞我既銀包...大少係我呢刻唯一既希望呀...點知大少話無喎...

跟住大少就起左身同我搵...不停地叫我冷靜啲..不停叫我重組案情，諗下尋日既經過...
我周圍搵...尋日著過既衫褲..用過既袋..梳化..我甚至連雪櫃同洗衫籃都搵左兩次都搵唔到..

搵左一陣大少就改口話..您一定係趺左啦...果刻我真係好Down..down...好混亂...

我開始絕望，唔通我真係跌左...我開始諗咪要攞身分證..cut曬d信用卡...

跟住我就見到大少攞住我既..銀包呀...原來銀包跌左向大門入口堆鞋堆裡面呀..我估計係我尋日返到屋企，將袋裡面啲野攞出黎雪入雪櫃時，連埋銀包跌左出黎呀...

我果刻真係..真係覺得大少好叻...背後發光呀...跟住大少就開始閙我嘈醒佢，邊閙邊行入房瞓啦..

我仲趕得切返工..好彩今日早左起身...報告完畢....

我‧懷‧孕‧了

我...失蹤左個幾月啦...好耐無上博了.. 我之所以失蹤個幾月既原因..因為我..我‧懷‧孕‧了..哈哈..
六月尾開始覺得好攰.好攰呀..開始時以為自己感冒了..放了幾日假.. 跟住到我好番啲後，開始出智慧齒，痛左一個星期..終於捱唔住去拔牙呀...
之後以為咩事都無啦，點知就開始覺得想嘔呀..想嘔呀..我開始至懷疑自己可能有左喎... 未驗之前，個心八上八落，心大心細，我都無諗過自己會..懷孕呀...
終於終於證實了...我同大少講..大少聽完無咩反應，我亦好攰去左抖抖... 但過左一星期大少提都無提過呢件事，我就開始情緒低落..胡思亂想咁..終於忍唔住問大少咩事呀..點知大少話︰乜您講真嫁，我以為您講笑咋...我..我..而家知啦..我要啲時間冷靜下..
之前一直都好攰好攰...返到屋企連電腦都唔開...唔想上網...淨係想攤向度..攤向按摩椅... 我而家已經三個多月啦..情況開始穩定了，所以我今日出現了....哈哈..
點知一上博就睇到雅虎既公布..呢個YBlog要執了..我唔可以再繼續寫落去啦.. 我諗要搵定地方搬啦..但搬去邊到好呢..請大家有無詳好既提議呢!!!!

釣‧墨魚

星期六出海釣墨魚呀...

出發前一日竟然掛上3號風球，好彩一點兒都無受影響呀..而且仲因為風球過後天氣一點也不熱，涼涼的..唔錯呀..

全船二十三人，亦有日本人參與，上一次他們的成績係零，無錯，係全船人零收獲呀..

嘩..唔係卦，我真係未聽過全船人零收獲既事件，竟然發生向同船人既身上，好彩上次無我份者...

至於我自己...幾年前我同大少去過，我個人既成績係零呀...大少就有既...

今次全船人都抱住零的突破心情上船，上船前已經食飽飽..坐在船頭前的確非常舒服呵..

到達目的地，附近無乜其他人，開始我地既釣墨魚行動，等了一陣仍未有任何動靜，然後船的另一邊傳來呼叫聲，即係有人釣到啦...嘻嘻...

陸 陸續續都有人釣到了，我仍然未有..終於我有零的突破啦...釣到第一條了...歷史性時刻當然有影低去啦...有左經驗後，釣得亦相當暢順呀..全晚發 生了一段小插曲，日本同事同其中一個5歲小朋友玩，點知小朋友唔小心跌左隻鞋落海，日本同事話不二說地跳落海執番隻鞋上黎，結果係佢褲袋裡的哎瘋5報

全晚個人總成績係12條呀...勁呀..呵呵..

大少話︰連您都釣到12條，即係成個海都係啦!!!!

炒‧魷魚

我..超過一星期沒有更新了..哎呀..就快連週記都稱不上了..

過去的一星期多其實頗忙碌，好像發生了很多事，但我又已經不記得了..

上星期初..小包病了..被感染了手足口病..但病情不太嚴重呵..仍然活力十足，精神良好，但依然放了至少一星期的病假，沒有上學...

上星期三端午節，剛好遇上大少放假，我同大少都唔好糉，所以我地無食過糭，而我當日亦懶得煮飯..放假日子唔煮飯同大少落街食..我記得..大少果晚好似係有抺地...

上星期五，沒有上班的日子，因為我被奉命照顧小包三天，這三天真的..真係精彩啦，小包已經好返晒，精神爽利咁玩...三天裡面我覺得小包有時好乖好聽話，講野好攪笑..

姑媽呀..您請假黎湊我，係唔係會被人炒魷魚嫁...

姑媽呀..我要食意粉，食上次果間呀..>但我已經唔記得左小包講邊間<..帶小包去食另一間，小包唔肯入去，仲話臭添..經過小包多番提示我終於醒起小包所指的意粉店，去到時好多人等緊位，但小包堅持等，結果我地等了超過半小時呀...小包好有主見呀呵..

去玩具城玩排隊玩..有其他小朋友排隊會主動讓比人玩..

買了鮮奶回家，吩咐小包攞去雪櫃雪，結果第二日發現鮮奶被雪在冰箱結成冰了，小包解釋雪果陣下面無位，上面有位嘛..咪雪上面囉..

有時又好唔聽話，同我鬥氣..

夜晚十一點喊住話好肚餓..要食飯..結果三更半夜真係食左半碗飯至瞓...

坐唔定，同身郁，唔可以坐超過三分鐘會被蟻哎咁...

成日都公主..公主..公主..上曬腦呀...

就係咁我向包嫲家同小包渡過左三天精彩既時光，但身心疲累呀...

臨離開包嫲家時，包嫲準備了這道菜讓我帶回家，因為我唔識煮..炒魷魚..

令我想起小包的話︰姑媽呀..您請假黎湊我，係唔係會被人炒魷魚嫁...嘻嘻!!

蒸‧梅菜鯇魚‧梅子排骨

這兒繼續被封塵了，繼續係一星期才更新一次呵..

這個星期工作很忙，忙得連星期六都要返工呀..我只有安慰自己係能者多勞吧..

不過其實星期六返工都唔錯，巴士少左一半人坐，時間又快過平時，公司非常寧靜，因為星期六係唔駛返工，所以得小貓三隻，我係其中一個，向無人打擾下工作效率都快d呀..

但到四點鐘我開始頂唔順覺得好攰了，所以自我提早放工了，工作做得不錯，其實我還有星期一同星期二嘛...總之星期二放工前完成就得啦..

星期日終於可以瞓瞓多一陣啦，好可惜被大少嘈醒左，都我自己衰先既尋日話要大少陪我食早餐，但今朝又唔想起身...

惟一的星期日真係唔想落街買餸，請了姑丈哥哥幫手，比定個列表等哥哥去街市照單全執，我既狀態係可以煮飯既...煮左三個最簡單既餸，魚肉菜有齊呀，加上冬瓜滾湯..

煮‧油鹽水花甲

這兒快快被封塵了，一星期才更新一次呵..

星期日遇上我家大少放假，有著豐富經驗既我，心知如果等大少一定要三四點有得食...所以我晨早自己起身去左食快活早餐..然後買埋材料返屋企煲定湯...

我家大少終於等到四點半才出動呀，大少還有要求地食佢至愛既車仔麵呀...於是乎我地好豪咁專登坐的士去大少要食果間車仔麵店呀...

既然已經外出，於是乎我地去左街市一轉買了點海鮮返屋企煮..由公主小妹煮既油鹽水花甲呀..

這種花甲很大隻，我反而覺得麻麻地，我覺得細隻好食啲喎...

蛋蛋百日宴

星期六係蛋蛋bb既百日宴..祝蛋B快高長大，聰明伶俐...

原本我約左小包早點去睇鴨鴨既..但係點知落雨擱置無得去..真慘呀..

好彩出門口去飲時已經停左雨咋，唔係就煩啦...未夠七點鐘去到酒樓，小包已經比我早去到了...

主角蛋蛋bb正在食奶呀..我就同雀友一齊打麻雀，掛住打牌連相都無乜同蛋b影過添...反而無聊既大少影左好多張喎...

入席後佈置用既吹氣字母已經無用，姑婆攞晒落黎比小包玩，小包同其他小朋友玩得好開心，最後小包仲同其中一個小朋友爭要S字，攪到喊曬添，最後都係小包成功帶左返屋企!!!

煲‧豬手薑醋蛋

星期三清晨當我還在沉睡中...比大少嘈醒左...

大少話比我知原來係黑雨呀...果刻係六點鐘呀...我仍然未夠鐘起身，我亦認為黑雨係唔會掛得好長，我深信到我夠鐘起身返工時，黑雨已經會無左，完全無期望過...

七點開始陸續收到各人既what's app議論緊黑雨呢件事...仲宣佈埋全日制學生停課添，即係小包唔駛返學..我亦都唔駛返工....住!!!

可以繼續瞓...到九點九黑雨至變左黃雨，根據公司既指引，兩個鐘頭內要返工...多得呢個黑雨令我可以瞓多兩個鐘....嘻嘻哈哈...

今日大少其實係放假既，我出門口返工時呢位大少係廳度自在地打緊機，真係羨慕死我呀....

晚餐我要食壽司，大少又唔反對，結果去左間新開既連鎖壽司店，出奇地好味喎，意料之外呀....

不過今日最令我出奇既係...大少居然早到，唔駛我等佢呀....我約大少，大少每次都遲到，每次都要我等佢，每次都激到我生蝦咁跳，但今日竟然早過我到...

我認為今日諸事皆順，令我身心舒暢既一日呀...隔左咁耐至寫返幾日前黑雨既事添..

我的豬腳薑演變版..豬手薑醋蛋再次出現..因為我鍾意食囉...

炒‧銀芽素絲

星期日居然外出了，能令我在假日外出不外乎這個原因..

小包係其中最大既動力呀...我唔係人人都想見既嘛...

今日世界變了，每次家庭聚會中，包爸永遠是例遲的一位(同我家大少一模一樣)，我們永遠都要等他，但今天包爸竟然係最早到的哪個，由佢攞埋位開定茶等我們...真係難得啦，世界變啦啦啦!!!

小包今日當然係靚啦，頭頂還戴著我在廸廸尼買的大蝴蝶結呀...

只係五月份而已但天氣真係好熱好熱，熱得黎濕度又高，今日向條街度真係好熱呀..但小包依然樂不亦乎呀..

真係不得不開冷氣呀...我已經開左幾日冷氣啦，因為真係頂唔住呀..

天氣咁熱，食得清淡點點..

煮‧鮑魚麵

星期六了，像我這些五天工作的人，連續三人都是假期..

大少要返工，我依然可以繼續我既假期..既不用煮飯，也沒有約會..

唔知自從幾時開始我變得不在喜歡假期外出了..我寧可宅在家..享受寧靜生活..

有什麼事要做，有什麼野要買，最好在星期一至五外出去做好了...

星期六有從媽媽家拿回來的鮑魚，我只是配上一個鮑魚麵便可了..

真正的鮑魚麵呀...豐富呵...我其實從未煮過鮑魚，下次可以試下..

煲‧粉葛湯

佛誕假期本應可以讓我瞓個痛快..

點知屋苑警鐘竟然向七點鐘響呀...嘈醒左我呀...

原本我只以為是誤嗚，好快會無事，不打算起身..但警鐘依然地響，隔左一陣我仲聽到消防車聲，不得不下床，走出露台望下，與此同時，我亦見到其他住戶同我一樣向露台望..

我見唔到有火災既痕跡，亦只見有消防車駛入對面座數...很快警鐘亦無再響了...

我已經被擾攘起來了...然後我當然選擇再瞓啦，瞓左一陣(只係一陣)，我就被大少嘈醒左...

連番打擾我已經瞓唔番啦，於是乎我決定起身落街食我既快活早餐呀...

自從大少轉左工，新公司有免費豐富膳食提供後，我已經唔再大少既膳食而張羅了，所以煮飯既次數亦唔多了，唔煮飯我唯有煲過老火湯啦..

雖然大少公司其實每日都有老火湯提供，但我同公司總有分別既!!!!分別係公司多料好飲過我煲既..我都明既..

天氣又熱又濕，煲粉葛湯為自己也抽抽濕吧..

煎‧三文魚腩邊

終於捱到星期四了，無錯係終於...等到頸都長埋呀...

這個五月過得特別特別地慢呀，還要再捱兩個星期呀..感覺慢通常是因為無乜野做，但五月偏偏不是呀...

要處理的工作好像沒完沒了...枱頭的檔案疊得愈來愈高呀..

前兩日平d節目介紹三文魚，的確係一個唔錯既選擇，但係我未見過有佢介紹到咁平喎...莫非我所到之處賣既野都係特別貴既...唔通係咁?!?

煎三文魚腩邊，冰箱長存有的存貨，想食時..無買餸時..攞出黎解凍煎一煎便可..

煎得脆卜卜咁..非常方便簡單的存貨之選呀..
 

煎‧泰式魚餅

母親節快樂呀...

這個母親節既已提前在星期六慶祝，星期日便沒有再外出了..

星期日本是應該煮番兩味，可惜不知道為何這個星期日卻懶洋洋的，直程瞓足左全日呀..

我都好懷疑點解我自己可以瞓到咁多呀...曾經懷疑夜晚會瞓唔著，但竟然無喎..我真係犀利呀..

既然無飯煮，唯有找來是我上星期日煮的泰式煎魚餅呀..今次因為唔夠咖喱醬，沒有上次般香口，要快快買番啲紅咖喱醬至得啦..

我的泰式煎魚餅食譜

材料

* 鯪魚肉* 豆角數棵* 泰式紅咖喱醬兩湯匙


煮法

* 豆角去頭去尾，放入滾水略灼，瀝乾後切小粒
* 將鯪魚肉，豆角粒放入大碗內，放入紅咖喱醬及糖調味..* 以同一方向攪勻，放入雪櫃雪最少一小時..
* 從雪櫃取出分成相等份量的..
* 先取一份量，並用雙手揉成圓波型，再按扁...
* 熱油後，下蓮藕餅慢火將一面煎至金黃色後..
* 再反轉煎另外一面煎至金黃色，再把周圍煎煎便可..

母親節火鍋夜

母親節快樂呀...

這個母親節提前在星期六慶祝，既然是慶祝母親節，當然係揀媽媽最鍾意食既打邊爐啦...

苦苦思量後決定都係留在家食是最好的，免得同人迫之餘，又唔駛被人抬貴價錢喎..簡直係最好既選擇呀..

由我同包媽親自到街市買材料，材料新鮮，當然係好味啦....

買了一條全家人都鍾意食既象拔蚌，雖然貴但真係鮮甜無比呀...



棄雪藏肥牛，買了新鮮手切牛，但不及上次包爸買的..



全屋人唯獨媽媽是不食牛的，因此有豬肉片..

這個脆肉鯇真係好好味呀...

為了我自己而這個脆肉鯇真係好好味呀...

 

今日真係辛苦曬，包媽負責同我買野，然後又要洗洗切切...

忘記一提是小包今日著了條新裙，好靚，成個花仙子咁...

祝母親節快樂呀!!!!