西餐班 │ 荷蘭牛柳

今晚無大少催促我，我可以慢慢慢慢咁寫啦..
尋晚既西餐堂晚餐真係好好味既播，有酒店水準..
皆因阿Sir係酒店做既咩，嘻嘻!!我就抵晒!!
成碟晚餐有主菜牛柳，同伴菜既焗蕃茄及翠玉瓜!!

最難整，最費時既係牛柳汁，要用兩個鐘黎..
所以一開始上堂要即刻煮個汁先，由阿Sir煮理..
其實呢個汁上堂都有整過下，整法其實同牛肉湯有啲相似..
要用好多材料去煲，可以一次過整多啲，然後分袋放入冰格..
有需要用時攞出黎翻熱就得啦，可以放上兩個月，慢慢用!!

主菜荷蘭牛柳食譜
DUTCH FILLET STEAK
煮牛扒汁湯底
* 牛骨牛筋一磅，放入焗爐焗香
* 炒香洋蔥，西芹菜，紅蘿蔔，月桂葉，黑胡椒粒
* 放入茄膏攪勻，下1安士麵粉攪勻2分鐘至微黃
* 下兩湯殼水，用拂蛋棒拂打至爛.
* 打爛它令其沒有粒，然後又再放一湯殼水，繼續打至爛..
* 共分4次下水，這步驟做4次囉..
* 放入清水牛骨牛筋滾起轉小火煲1.5小時成為"黃湯底"
* 重點︰煲西湯講求清湯，因此煲湯時不用上煲蓋的..
如果無時間煲呢個汁，咪用現成汁取代啦!!
煮牛扒汁
* 將湯用大筲箕隔渣，只餘下汁液..
* 切碎少許乾蔥及洋蔥下鑊炒香，再倒入汁液便可..
*****其實我真係覺得好複雜囉，攪咁多純粹得個汁*****
煎牛柳
* 牛柳去根，切成圓形
* 以鹽，喼汁，黑胡椒粒略醃
* 以煙肉在牛柳外邊包好，用廚房繩札好
* 平底鑊下油，當鑊冒煙後，中火先煎香四邊煙肉
* 然後再煎牛扒兩邊，每邊約兩至三分鐘(視乎牛柳厚度)即可

焗蕃茄，睇個樣以為係芝士，其實唔係呀!!係荷蘭汁..
唔..以我黎個唔食蕃茄既人黎講，小試一口，都覺得好味..
其他同學仔大讚這個焗蕃茄好好好味喎，真係既!!

配菜荷蘭汁焗蓄茄食譜
* 蕃茄去蒂，在頂部刮去蕃茄籽
* 放入已預先焗爐，焗至淋身取出
煮荷蘭汁
* 牛油放在熱水上溶熱
* 在熱煲中先打勻蛋黃至一定程度，慢慢下牛油及黃湯底
* 打至汁滑成荷蘭汁，試味(感覺很油，有點好似曲奇餅感)
* 將荷蘭汁淋在蕃茄面，放入焗爐焗多5分鐘即可