志太部落格: 海洋公園...生日遊

給自己的...生日快樂呀...

今日是假期之九/十一，亦係呢個假期中唯有一日有計劃既行程，就係去海洋公園啦!!!無錯，因為呢個係非常之抵既生日慶祝活動，自從小包出世後，基本上，每年既十二月總有一日我地會去海洋公園，一係大少生日，一係就我生日時去，自從小包開始返學後，我諗只可以等我生日果日去囉，因為一定係學校假期呵..

今年除左我同大少外，仲有公主小妹同姑丈哥哥一齊去，一行五人一齊去，公主小妹話︰我一個人既快樂建築係咁多既既痛苦身上喎(因為其他人都係要比錢入場)，不過好明顯佢唔係為左我，而係為左小包...嘻嘻..

四歲大既小包，今次係第三之去海洋公園，之前去次次都因為三歲以下唔駛比錢，今年我都想試下蒙混過關，唔買飛，入場前我同小包不停反覆測試..

志太︰小包，您今年幾多歲呀..
小包︰我5歲呀..
志太︰唔..去海洋公園時，哥哥姐姐問您幾多歲，您可以講3歲..
小包︰唔係..我5歲呀.老師話我5歲呀..我大個女啦，讀k2...
志太︰唔..係呀..不過其實您未5歲嫁喎，您4歲之嘛..
小包︰唔係...唔係..我5歲啦，我唔係3歲，3歲係BB，讀K1，我唔係呀..
結果，小包不停地.堅決地.堅持地..話自己係5歲...

第一站當然係去睇魚魚啦..

小包對於入場票，真係愛不釋手...成日睇住..數住呀...一共有5張呀..有海豚..有海獅..同埋熊貓..

睇完魚，進入精品小店，我地當然要影番幾張相啦，小包由一次攞住一隻公仔，之後慢慢一次攬住好多隻公仔，睇下小包笑得幾咁開心呵..嘻嘻..但小包影完相之後就會自動自覺地擺返回原位..真係乖啦...

之後，小包要去坐木馬，所以我地去左住旋轉木馬..然後去左新既懷舊香港地..我地第一次去，對小包來講，呢度毫無特別，最多咪有架叮叮咁囉..睇下小包成日攞住張地圖，指示我地下一站..真係勁呀..

坐覽車去另一邊，之後就去睇期待既企鵝啦，小企鵝比我想像中細隻，細細隻，成班企鵝行黎行去，真係好得意好可愛呀...之前有人投訴企鵝內太凍(咁都投訴)，哈哈..我地呢日本身外面都已經好凍，著晒厚褸，所以溫差唔大，唔覺得凍..我諗夏天黎就會覺得好凍囉...

離開企鵝館，小包開始扭計要抱..喊曬口，仲比大少剷..但最後都係大少屈服左，抱左小包一陣..哦..其實都係我地唔岩既..睇下個鐘原來已經兩點鐘..我地仲未食野，小包一定係又攰又肚餓呀..我地即時向小食亭買條腸同雞脾醫肚先，然後再去食野..

食完野就去左排隊坐幸福摩天輪，排隊排左45分鐘呀...坐都咁高，小包一啲都唔驚喎..仲不停向下望，坐都咁高上面真係好凍好凍好凍呀...食風摩天輪呀..我借埋條私家頸巾比小包用呀..