我與小包假期(2)

一心以為今早就算沒有八號，也應是三唬啦卦..
點知一早聽到包嫲不停地叫小包起身..起身呀..
下..原來所有風球都已經除下啦，即係小包要綵排..
小包要好似大少咁叫極都唔起身..起左又瞓過..
好不容易終於起身梳洗後，食麵包..換衫衫..
今日係綵排..可以著便服，包嫲一早安排左花花連身褲..
但小包堅持唔肯著仲喊晒添..我唔要我唔要..
包嫲就話小包咁細個就揀衫著...小包就堅持唔普...
噢...終於都係包嫲屈服左，著過另一套啦...哈..
問小包，嫲嫲帶您返校啦..唔得!!我要姑媽..
小包真係好帶擊啦..我又要迫住一早起身梳洗返學了...

小包一落街見到滿地榭葉，同樹枝..簡直係噢晒咀呀...


第一次帶小包返學，見到小包自己行入課室坐低左..
原來隔離位果個係男同學仔...小包仲同佢傾計添...
然後我又再被小包欽點我去接佢放學..攞住接送咭..
老師會嗌小朋友既名，然後將將咭放在小桌子上..
小朋友會自己行出黎，然後向小桌子攞返張咭行出黎我面前..
點知當小包放學行出黎時突然間落好大雨..哎呀...
我地唯有迫於無奈地行向校門前等下停啦..好彩唔係好耐咋..

午餐後迫小包午睡一下..其實係我想瞓..我咁早起身..
小包瞓向我身邊不停地玩根本無..唔知過左幾耐腄左...
醒後我就帶小包落街啦..先去醫肚..跟住又去反斗城玩遊戲..

小包睇中左盒整雪榚泥膠..叫我買，其實好似幾好玩..我都想玩呀..
可惜被包嫲強烈反對呀...小包喊住要買呵...我喔速離現場呀...
最後我買左盒顏色筆比小包..小包又笑番曬啦...
之後去左行街街買衫衫，試左好多衫但不是太大便是太細了..買不成..
已經係晚上八點幾了，問小包佢每次都係話食壽司..但太多人等了..
我決定壽司返屋企食吧啦..飯完同小包玩填顏色....
小包揀左"烏龜"同"青蛙"好明顯小包求其咁油..

小包仲話青蛙屁股受左修所以流血..係紅色既..哈哈...
油完色，小包就帶"烏龜媽煁"同"青蛙寶貝"去沖涼啦...
呢兩隻公仔上色後放入水便會發漲便大了，小包就帶埋佢一齊沖涼..

小包玩得好開心好開心呀...仲自編自講故事添呀...
今天發現全日照顧小包的確很疲累，特別係佢唔聽話時...累也..
我的私人時間亦都無晒啦...這篇這樣長的內容，我都寫到..
是因我同小包而家在玩睇醫生遊戲，擔當醫生的我在寫病歷而成...
寫了很久了...分了很多次而寫成的..

我與小包假期(1)

很久沒有探望小包了..趁今個假期大少有要事，無暇理會我的日子..
我決定將呢個假期奉獻比小包了..哈哈...
放工回到包嫲家..小包已經在玩..玩得通地也是玩具..
然後..食飯..跟住我地玩買東西遊戲..順便教佢數下錢...

天文台已經一早預告左今日會掛八號風球啦..果然...
小包也懂得打風..好大風..好大雨呀...
小包還可愛到打電話比大少同姑姑...
叮嚀他們打風唔可以去街要留向屋企喎...哈哈..

小包同大少講︰
小包︰打風喎...好大風喎..您唔可以落街，唔係會比風吹走您...
大少︰我咁大個，唔會比風吹走嫁..
小包︰會嫁..您要留向屋企呀..知唔知道呀...
大少︰知道啦!~~>>大少突然變得幾乖呀<<
小包︰您知唔知道我聽日要去....呀..呀...哎呀..我唔記得左添呀..
>>我提小包︰係..綵排呀..小包永遠都唔記得"綵排"呢兩個字..<<<
大少︰係呀...聽日打風您要留向屋企..唔可以返學喎..
小包︰係喎..姑媽..我聽日唔可以去....(綵排)呀..
而家小包真係無時停，我又無帶相機喎..
只有靠我那個哎瘋好了...刷牙時影得最好了..

明天星期六小包要回校為音樂會而綵排..
唔知道起身時風球發展成點呢...小包有無得返學綵排呢..
這幾天希望能有限度地在此紀錄我與小包既假期..

遷就下‧蒸排骨

今日與某同事閒談..

突然間，佢問我︰其實您同您老公係咩關係既..

同事話點解您講親你老公都係衰果啲野既...

佢無好野比您講既咩..下..您地關係咁差嫁...

我聽完..哈哈...

其實呢位同事得知大少既消息全部係黎至"飛士卜"既..

全部都係大少嫌棄我新菜色既說話...嘻嘻..

我又真係只會寫大少衰野..>>鬼叫佢無好野比我煮咩...

正如大少只會對人講我壞話，佢一定唔會同人講︰我老婆好好(我估)..

哎呀...我要檢討一下，定係大少要檢討下呢呵...

既然大少咁想咁想蒸排骨..

我一家要滿足下佢至得既..反正蒸排骨係等閒事..

煮左咁多日新菜色，都要遷就一下大少既..

又一次表現我對大少幾咁好既機會呢...

芝麻醬‧棒棒雞

唔知大家係唔係都覺得我被大少蝦..

所以今日多左好多大家既留言呀..

嘻嘻..多謝大家既關心..呵呵...

我份人太大量..第二日已經無左嬲啦..

夏天既日子真係真係好熱呀..

所以我早早已經決定要整芝麻醬棒棒雞呀..

其實點解叫棒棒雞呢呵..我又唔知喎..

我見街外餐廳菜單係咁寫既..我照跟者..

芝麻醬用了現成的因為方便又快捷..簡單!!

今日無意地發現到同日同報同頁，所報導的新聞卻不同..

我今日睇過同一份報紙有三頁紙所報既新聞係唔一樣既..

唔知大家平時有無發現到呢呵...

見大少打羽毛球打得咁開心..

所以我又要去打，飯後去會所打了一小時羽毛球..

嘩...我估我有十年以上沒有攞過羽毛球拍了..

唔知聽日會唔會手痛呢...

炆‧七喜骨

我好努力咁煮...

今日我一早去買餸煲湯..等大少放工返黎食..

我好用心咁煮..

好可惜..大少一返屋企就話約左人去會所打羽毛球..

我要向屋企煮飯..原本七點可以食..等到八點幾..

然後，放好晒啲餸後，大少話喉嚨好痛..唔食飯..

頂呀...我真係嬲到爆炸登呀..我差啲想倒曬啲餸...

上星期煮左可樂骨，好味又簡單..

本星期試煮七喜骨，好味又簡單..

今次用左另一種方法煮，同上次可樂骨唔同..

其實我用雪碧煮..七喜骨..今次有多少少汁剩..

還有我那支超大要速銷的茄汁而煮成的呵..

誤打誤撞而成的七喜骨呵..

味道有少少似..京都骨咁..酸酸甜甜..好味道...

原本等大少返黎時心情仍然好好..好..

睇下..我有好多時間整靚靚啲蔥就知啦!!!!

可惜一開飯就比大少破壞晒我既美好心情...

今次的七喜骨

上星期煮的可樂骨..

按此可樂骨食譜

我的七喜骨食譜

材料

* 金沙骨2磅

* 原味雪碧1罐

* 生抽1湯匙

* 茄汁2湯匙

* 蒜頭去衣3粒

煮法

* 金沙骨先以生抽，糖，粟粉醃半小時...

* 下油熱鑊，下金沙骨將四周略煎便可，令其鎖上肉汁..

* LC煲放入雪碧滾起，放下排骨..

* 再放入生抽，茄汁及蒜頭中火滾起，轉小火炆30分鐘..

* 待排骨已淋，轉中火開蓋收汁便可..

我的No.67/100七喜骨完成，材料真的很簡單，簡單又好味..

不知道我下星期會唔會煮忌廉骨呢...

蒸‧冬腿桂花魚

端午節快樂...

我同大少對糭都唔偏愛，所以今日無特別食糭..

今晚指定食材要求環節又黎啦...好似烹飪比賽咁..呵呵!!

我尋日又要求大少講出指定今日要食既菜色..

大少︰咁蒸排骨呀...

志太︰咁普通..

大少︰唔好咩..簡單啲嘛..一係沙薑雞翼..

志太︰哎呀...我唔要呢啲呀...呢啲返工趕時間成日煮啦..

大少︰我對食都無要求既..呢啲幾好呀..

志太︰得啦..您唔好講點煮，您只係講︰食材得啦..

大少︰"魚"啦..

所以我今日既指定食材係.."魚"..

當然我唔可以整炸魚啦...我知我知大少至愛煮法係..蒸魚嘛..

我要朝住呢個方向諗...但蒸又有咩特別呀..洩氣呀..

買餸前毫無方向，然後走入書店..隨手拿起了幾本烹飪書..

卒之比我搵到符合我條件既新菜色啦..條件係..

** 滿足大少要係蒸魚..煎魚炸魚統統唔得..

** 要簡單唔複雜，我有信心煮得好..

** 我從煮過既，作為新菜色之一..

最後，參考了江獻珠女士書集..整了"冬腿蒸桂花"(我改的)

全名係"冬菇雲腿蒸桂花魚"..哈哈..

當大少食飯時問︰乜我唔係講左..蒸排骨咩..>>唔通大少真係咁想食...

志太︰係呀，不過我拒絕左嘛...最後決定係"魚"嘛..

食時，大少話︰咪又係蒸魚之嘛...>>>激死人呀..

志太︰您覺唔覺得咁樣好似勁左呀..呀...呀..

我的冬菇雲腿蒸桂花魚食譜(取自江獻珠女士書集，再自我簡化版)

材料

* 桂花魚一條

* 金華火腿一片

* 冬菇1顆(浸軟)

* 蔥絲

煮法

* 桂花魚洗淨，以廚房紙抺乾..

* 在魚身以斜切方法界開四刀..

* 將冬菇去蒂，以斜切方法界切成四小片..

* 另外，金華火腿切成四小片..

* 將冬菇及火腿片各一放在魚身界開位置上..

* 煲滾水後放入蒸架，放上雞件盤大火蒸8分鐘..

* 取出放上蔥絲，倒入蒸油豉油及熟油即可..

我的NO.66/100 冬腿蒸桂花完成，製造過程不難...

最擔心火腿會否過咸，但又無喎..滿意!!!

滾‧芫茜皮蛋鯪魚球

大少喉嚨痛..

有少少變左聲添呀喎..

大少話之所以會喉嚨痛全因為我..

因為我煲左芫茜皮蛋鯪魚球滾湯喎..

佢真係真係賴得就賴呀..邊關湯事呀..

因為佢晚晚唔瞓之嘛..唔夠瞓出事多啲囉..

當然大少係無去睇醫生啦!!!例牌啦..

我今日午餐..食左日式御結便當..

以HK$50送埋黎公司都算不差既..

仲有..仲有..今天去"慢令"買野，買滿HKD99..

仲有5包公仔面同一支茄汁送喎...

呢款公仔面我從未食過，由細到大都係食一丁...

仲有咁大支茄汁我都唔知點用好...

平時煮飯都無咩機會用茄汁既..

我只係識得整茄汁蝦碌咋...點用好呢..

蕃薯煮‧咖喱雞

我成日都會問大少想我煮咩呀..

每一次大少總係答我︰您鍾意啦..是旦啦..

無一次大少會講指定要我煮啲咩既喎...

這次我堅持要佢講出一種食材..我會用佢黎煮餸...

我完完全全無諗過大少會講︰蕃薯...

豬牛雞羊魚蝦蟹..過千樣食材大少唔揀..

竟然..係蕃薯...蕃薯...蕃薯..蕃薯...

我又唔覺得大少平時鍾意食蕃薯呀...

哎呀..我無理由煮蕃薯糖水呀!!!!我要用蕃薯煮新配搭..

由於時間既關係，煮飯時間又有限..

但我唔可以唔做..唔煮既..所以我決定整咖喱雞..

以蕃薯代替薯仔，用呢整咖喱雞應該得卦(我估)..

買了黃色同紫色各一..見到紫色一定唔會以為係薯仔啦卦...

一個很豐富顏色的咖喱雞呵呵!!!!總算過關囉..

鹹蛋‧裂紋

尋晚，我失眠呀..

瞓唔著，行出露台吹吹風..

攪到大少撲出黎以為我有心事唔開心添..

終於理下我啦，唔會淨係顧住部電腦囉..

我迫大少同我傾計..不過佢瞓向床上面眼仍然向電話上..

志太︰尋日奇洛李維斯向我公司附近拍戲呀..

大少︰超..明星我成日都見既啦!!!!

志太︰咁..邊個明星您印象最深刻呀...

大少︰唔...XXX(某女星名)..

志太︰呵...咁邊個女明星最醜樣呀...

大少︰XXX(本人全名)囉..

志太︰嘩...原來我係您心目中係等於明星架...嘩哈哈....

大少已經反白眼唔再理我啦!!!!

上述為昨晚凌晨無聊對話節錄..

返回今日正題...

自從我醃左鹹蛋後..我每日都走去睇下佢既情況...好無聊呀呵..

今日我發現到最底果隻出現左裂紋呀...點算好呢呵...

係唔係我上面壓得太勁，攪到最底果隻裂左呢...

我要唔要處理佢呢，還是唔駛唔理佢呢..

如果唔理佢，佢又裂左，會唔會影響其他果三隻呢...

會唔會一個月後至發現失敗呢...

請各位有經驗人士賜教...謝謝..

浸‧話梅車厘茄

最近我好勤力咁嘗試煮新菜色..

有時會好成功我會好開心囉!!!

不過有時都會好失敗既，呁唯有再接再厲囉...

為求得到大少認同，我多偏向煮啲大少會鍾意既..

咁樣可以增加大少讚賞既機會率..通常都準既..

大少啲口味來來去去都係果幾種..

只要我唔好太過新穎就得..

可惜...

可惜..我今次估計錯誤囉..

我見好多人都讚"話梅浸蕃茄"好食..凍凍地..

我咪諗住照辨煮碗整比大少試下啦..嘻嘻..

眾所周知我係唔係蕃茄既..生既蕃茄更加唔會食..

呢個小食我完完全全為左大少而整既...

之前我都有見大少買啲蕃茄仔返黎就咁食嫁..

我只係將蕃茄剝皮，然後用話梅汁浸一晚者..

話梅汁我有試過味呀..無問題呀..酸酸甜甜囉...

但當大少食呢個"話梅浸蕃茄"，大少話好怪..

大少仲好嫌棄添呀...>>失敗了<<<

我只係覺得大少唔鍾意者，唔表示唔好食既..

自我安慰中...其實我真係唔知係咩味，我無食過..

我諗呢樣野我應該唔會再整了...

我的話梅浸蕃茄食譜

材料

* 車厘茄仔細盒

* 話梅10粒

煮法

* 車厘茄仔底部界十字..

* 放入已滾水中滾20秒..

* 取出放入冰水內，輕輕用手撕掉車厘茄皮..

* 話梅放入水煲20分鐘至出味，試味後攤凍..

* 待話梅水冷卻後，放入車厘茄，放入雪櫃雪一晚..

炆‧可樂骨

由星期五晚醃鹹蛋篇開始..

我在雅虎上載不到相片..成日都話伺服器未有回應..

開始時以為係雅虎既問題，打算遲啲啲再上載啦..

點知到星期六我仍然係上載不到，但卻發現其他人無問題..

原來呢個問題只係發生係我身上咋播，我攪極都攪唔到..

卒之攪左哥哥幫手，整左一陣又得左喎...唉..

到底有咩問題我唔知喎..

當完兄弟既大少竟然沒醉很清醒的回家..

星期日大少順便放假休息下喎..

醒黎專登外出去食大少至愛既車仔麵..

真係真係超級多人排隊，可憐得我三點至有得食...

今日好攰呀..唔想煮飯..我想瞓覺覺豬..

原本打算出街食飯算了，但醒起係父親節..無謂啦..

同大少講今晚不如食燒味算吧啦..免煮囉..

但最後唔知點解我地會去左街市買餸返屋企煮...

呵呵...

突然間諗起一個新菜色可以試下煮下..

可樂炆排骨..簡稱"可樂骨"..型啲..

我覺得幾好味呀..唔錯唔錯...帶飯又啱..又簡單..

雖然飯後要洗碗，但大少要抺地添呀..

要讚一讚，大少既抺地方式..佢唔用地拖...

大少向來都係以阿信式用布抺嫁...呵呵..

我的可樂骨食譜

材料

* 一字排骨2磅

* 原味可樂(紅色)1罐

* 老抽1湯匙

* 蒜頭去衣3粒

煮法

* 排骨放入已滾水中出水...

* 取出用凍水沖洗乾淨瀝乾備用..

* LC煲放入可樂滾起，放下排骨..

* 再放入老抽及蒜頭中火滾起，轉小火炆30分鐘..

* 待排骨已淋，轉中火開蓋收汁便可..

我的No.65/100可樂骨完成，材料真的很簡單..

基本上家中只有一罐可樂及排骨已經得...

我比較喜歡收汁後，醬汁變得黏稠稠般的..

星期六

星期六大少要去當兄弟..

睇見佢著住大會指定服裝..全身黑色..

一啲都唔似去做兄弟囉..好彩好個淺紫色蝴蝶..

大少仲話要戴吉蒂貓貓眼鏡喎..好CUTE!!!

好可惜大少禁止我將佢呢個碌公諸於世呀...

我就去左同小包玩啦..好耐無見囉..

公主小妹想食雞粉..我地千里迢迢冒住大雨..

坎入西貢為左食碗雞粉，我都覺得自己好無聊呀..

晚飯在家由包嫲下廚，屋企食始終比出街食好既..

大少當了一天兄弟所得到的就係因為要去便利店買野..

而集齊的印花，換了五個回家，五個中有兩個重覆的..

醃‧自家製鹹蛋

聽同事所描述自家醃製鹹蛋，好像不難也..

所以我決定試下整一整，因為夏天滾湯好多時會用到..

自家製至少沒有化學物質，感覺健康一點點呵...

醃製鹹蛋需要用品..玻璃樽，樽口夠大可以放得入隻手..

可惜我家沒有，原本我已經在十二蚊店物適左一個..

但上次太多野拎無買到，打算下次再去買過..

同事知道了在公司找到了一個飲品沖劑樽送我..謝了..

我的玉手剛剛好勉強地放得入既!!!工具有了..

午餐時去買埋鴨蛋同粗鹽..可以開工了...

買左6隻鴨蛋，但呢個玻璃樽最多只可以放到4隻咋..

原來醃製鹹蛋過程一啲都唔難..最難既係..

由於下鹽水後，鴨蛋會浮上面，需要在上面加上重物壓下去..

由於樽口太少，我搵左好耐好耐好耐都搵唔到啱物品壓住..

好苦惱...摷勻整個廚房..

終於搵到之前買落整甜品的膠兜，切修剪下又得喎..好彩咋!!!

起碼要等30-40天才可以食得，到時在報告下成果啦!!!

我的自家醃製鹹蛋食譜

材料

* 鴨蛋4隻

* 粗鹽

* 水(玻璃樽的份量多一點)

* 八角1粒

* 花椒2茶匙

* 高身玻璃樽

煮法

* 鴨蛋用布刷洗表面，洗淨後風乾..

* 玻璃樽放入滾水中灼，取出後風乾..

* 鑊中下水煲滾，下八角及花椒同滾..

* 下鹽不時攪拌，份量留意鹽溶情況(當鹽粒不再溶掉)..

* 熄火待鹽水完全冷卻而止..

* 確保鴨蛋及玻璃樽完全風乾沒有生水成份..

* 將鴨蛋先放入樽內，注入鹽水至高於蛋面..

* 將一項重物放上蛋面，目的令蛋壓下去，完全浸在水中..

* 上蓋放在陰涼處浸30-40天便可了..

炸‧蝦醬炸雞

曾誇下海口要整100道新菜色..

但事而至今已經達至年半了呵..

快要兩年了，至今只整左64道咋喎..

我真係要加把勁啦，希望在兩年內可以完成啦..

雖然大少從來無提過，當然更加唔會催我..

因為大少都無理過我，只係我自己一廂情願之嘛..

超...我為我自己而煮呵..所以整左炸雞..

炸雞通常會去家鄉伯伯度食，大少又唔鍾意炸野..

所以屋企未試過炸雞..只有炸雞翼..哈哈..

今次用左半隻雞..整蝦醬炸雞..呵呵..

用最簡單的兩樣醃料醃，簡單得不得了呵..

九龍醬園出品蝦醬沒有我想像般咸..唔錯..

炸時卻有濃濃的蝦醬味..連屋企出面電梯都聞到呵..

我的蝦醬炸雞食譜

材料

* 雞半隻

* 蝦醬2湯匙

* 砂糖1湯匙

煮法

* 雞斬件洗淨抺乾，以蝦醬及糖醃一小時..

* 糖份量我想要因應各款蝦醬咸量而自行調較..

* 臨炸前，將已醃的雞件沾上粟粉..

* 熱滾油，放入雞件下油炸熟透便可..

我的No.61/100蝦醬炸雞完成，簡單都不得了..

滿意作‧黃金蝦

同事送了我兩隻自家製醃咸蛋..

她事先聲明今次的鹹蛋黃偏黃..不是太靚呀..

感覺上自家製咸蛋沒有化學物質，健康多了..

所以我決定用黎整想整很久的...黃金蝦..

遲遲未整的原因，因為此屬於非常高危菜色..

之前睇過好多好多食譜我見材料用了起碼幾粒咸蛋黃去整..

嘩...嘩...我家大少已屬高危邊緣啦，所以要暫擱暫擱吧..

既然有自家製咸蛋..決意弄一次..黃金蝦..

自我改良了食譜，用自創諗法只用一粒咸蛋黃..

一粒咸蛋黃配六隻中蝦，兩個人分一粒咸蛋黃，不過份呀..

煮前戰戰兢兢擔心唔知效果會如何..點知效果比我想像好好多...

連大少都主動讚賞呵...

這可謂我近期滿意之作..賣相靚，味道佳..

偏黃色的咸蛋黃配上橙色蝦，更美呵..

我的黃金蝦食譜

材料

* 中蝦6隻

* 咸蛋黃1隻

* 蒜頭1粒切碎

煮法

* 中蝦去殼留尾剔腸，蝦身界開成花..

* 蝦身以鹽及胡椒粉醃..

* 咸蛋黃(只要蛋黃)隔水先蒸熟，取出壓爛成蓉..

* 炸蝦前加入粟粉拌勻，熱油下鑊炸，轉色彎身取起備用..

* 熱鑊下兩荼匙牛油，待牛油溶後下蒜蓉落鑊炒..

* 由於牛油很容易燶，因此加入一茶匙油...

* 加入咸蛋黃蓉炒，下中蝦落鑊炒勻便可..

我的No.64/100 黃金蝦完成，近期滿意之作呵..

HEA爆澳門行

預先張揚今天會去澳門了...

友人一片好心地叫我計劃一下行程..

唉..以我認識既大少，我根本唔駛編行程..

出發前一晚我問大少聽日幾點出發呀...

大少大言不大慚地︰九點出發，八點幾起身..

結果我起身梳洗完後，叫左大少 x 十萬九千次..

大少每次都話...瞓多5分鐘 x 十萬九千次..

習以為常既我好冷靜..沒有動氣..仲醒起仲未填報稅表..

晨早流流..走去填報稅表..哈哈.勁呢..

我有記錄住我地出門口果刻係早上10:11..

其實都唔算遲既啦..以大少過往既紀錄黎講..

去到信德碼頭其實都係11:00者，但無船位喎..

無奈地要等到12:30班船..大少不停地話自己好肚痛..

午餐只好在碼頭內餐廳解決，唔知揀咩下..揀左籣芳園..

中環很有名的小攤檔，搬進了冷氣商場..

食左個貴得黎好普通既午餐..毫無特別啊..

終於到12:30我地登船了..出發啦..

碼頭內有各間賭場既免費巴士..

求其揀左間去馬交果面既賭場車..

無錯!!大少話帶我去見識下各大賭場呀..

有好多間好出名既其實我都未去過...

大少又話啦︰入賭場唔賭錢就等於去餐廳唔食飯喎..

所以..最後..大少咪財散人安樂囉..呵呵...

至於我...我今日至知道原來每張枱既賭注最少係HKD300..

嘩...HKD300買舖大小呀，好貴下喎..吸引唔到我!!

終於比我搵都部自動大小機，每舖最小可以買HKD10..

憑我以淨買點數既主攻方法，用成本HKD100..換到HKD800..

哈哈...勁啦...好可惜我比大少敗曬啦...補番大少輸既..

我得個"桔"..好可惜..我地要走啦...玩左好耐啦...

點知..離開賭場時落雨，大少又問我駛唔駛去大三巴..唔駛啦..

我唯一想去食豬扒包者，點知山長水遠黎食既大利來豬扒包..

非常地很貴..HKD25...但唔好食既...氣死我啦..

然後大少話去買手信啦..阿邊個要咩...阿乜乜要咩手信..

人地既野真係上心，大少淨係買手信都買左HKD300..

對我又唔見佢咁好!!!

晚餐..食咩好煩惱..

志太︰食水蟹粥呀..

大少︰又貴又唔好食..上次食過啦，您唔記得咩...

志太︰咁食葡國餐啦..

大少︰咦...都唔好食既..

志太︰咁食麥當當啦..

大少︰如果您想我又唔介意嫁..

志太︰黎澳門食麥當當我返去唱衰您呀...

大少︰係..您知道話要食..食唔食牛什麵呀...

志太︰唔食呀..唔食呀....我唔食牛什麵呀.

最後我地去左間餐廳食大少鍾意食既..小菜..

我唔想再記起呢段回憶，相都唔想影呀...

大少堅持呢間餐廳係我揀既喎..

食完飯後..返香港啦..我無地方想去呀..

志太︰買手信比其他人就豪爽..同我食水蟹粥唔捨得..

大少︰我唔係唔捨得，但真係唔好食嘛..其實食都係您比錢之嘛..

返香港結束我地HEA爆澳門行..一去到碼頭即刻有船呀..

志太︰我覺得我地今日只得兩個景點囉..您知唔知呀..

大少︰係呀...賭場同買手信嘛..

志太︰原來您都知呀...