雲吞雞翅煲

我之前咪講我要煮啲大少鍾意既呀..

但我又唔係好鍾意既菜色既..

今日終於比我諗到啦..呢樣係..

雲吞雞翅煲呀，大少好似好鍾意..

大少之前成日同我講佢成日會去食快餐店套餐..

所以我覺得大少應該好鍾意佢..

至於我..就好麻麻啦，特別係煮湯既肉..

所以我絕對可以食少啲啦!!!

我覺得今次好成功，煮得好好味..

連大少都話好食過平時食既..快餐呀..

我的雲吞雞翅煲食譜

材料

* 雞半隻

* 瘦肉(HK$10)

* 金華火腿2小片

* 魚翅骨3片(浸軟)

* 薑，蔥適量

* 雲吞數粒

* 小棠菜半斤

雞湯底準備

* 雞洗淨，瘦肉洗淨切成小件..

* 將雞及瘦肉放入滾水中汆水，撈起備用..

* 魚翅骨及薑蔥放入滾水中汆水，撈起備用..

* 煲滾水後放入雞，瘦肉，魚翅骨，金華火腿及薑2片..

* 中大火煲20分鐘，改至小火煲1.5小時便可..

* 最後下鹽調味，便成了魚翅骨雞湯了..

煮法

* 準備食時，煲滾水，放入小棠菜灼撈起備用..

* 再煲另一滾水，放入雲吞烚熟撈起備用...

* 在上菜鍋中放入小棠菜，雞，魚翅骨，及雲吞..

* 注入雞湯滾起，灑上倒入金華火腿絲便可..

如果唔想咁油既話，可以去掉雞皮才煲..

雲吞是現成貨，不想為幾顆雲吞而自製了..

這個真的真的超級好味，好成功呀..

我的No.58/100雲吞雞翅煲滿意地登場..

枸杞豬潤瘦肉湯

五點幾時落好大雨呀..

據報好似係紅色暴雨警告喎..

不過唔關我事因為我正在熟睡當中..

但我家大少就正正在這個鐘數起身返工..

真係好可憐呀喎..但我繼續抱頭大睡..

我一直在家hea..hea..著..直至..

直至大少放工我仍然未去買餸喎..

好不容易去到街市..我行左十個圈..

我仍然未買到一樣野，只係一直行..

當我返到屋企時大少已經返到黎啦..

第一次煲..枸杞豬潤瘦肉湯..唔錯呀..

我的枸杞豬潤瘦肉湯食譜

材料

* 枸杞半斤

* 瘦肉

* 豬潤

* 杞子

* 薑數片

準備

* 枸杞洗淨，"小心有很多刺呵"..

* 將枸杞葉摘下，徑與葉分開備用..

* 瘦肉洗淨切件放入滾水中汆水，撈起備用..

* 豬潤在水中沖至沒有血水出，切片..

* 豬潤以生抽，鹽，糖，薑汁醃20分鐘..

* 杞子十數粒浸軟備用..

煮法

* 煲滾水，放入枸杞徑，瘦肉，及薑2片中火煲20分鐘..

* 煲好後，撈起枸杞徑唔要備用..

* 另一個煲內下油，放入薑2片及在豬潤片兩邊煎..

* 倒入剛煲好的湯汁，再放入枸杞葉及杞子，煲10分鐘..

* 最後下鹽調味便可了..

這個煲法是沒有打算食湯渣的，還以為大少會食枸杞葉..

但最後只係飲湯，無食過湯渣，早知如此我唔駛將徑同葉分開啦!!!

在家打邊爐

一早醒來天氣氣清..好好天..

但原來真係天有不測之風雲呀..下雨了..

原來還打算外出探下小包添..

呵!!好耐無見小包啦喎我...好掛住小包呀..

今晚公主小妹居然建議︰打邊爐喎..

仲要係在買返黎家中打邊爐果種呀..

見佢自願地買埋野，我只係負責食者..

明明上星期我至任食打邊爐咋，哎呀..

所以今晚在不寒冷既天氣下打邊爐呀..

所有材料都好新鮮呀..減肥計劃忘卻了..

聚

這個大約在上年12月為我慶生之約..

一直拖延至..今日我地4個終於約得齊啦..

哈..哈..一直拖左成幾個月喎原來..

睇黎大家都真係好忙呀..>其實最得閒果個係我<

對於食物其實我覺得自己要求一向不太高..

我唯一要求只是不要是︰"中菜"而已..

其實西，日，韓，泰，越...我都想嫁..

大家都應該明白點解既啦呵!!!

結果友人選址於諾士佛台..某泰國餐廳..

餐廳名已經唔記得，亦唔需要再記得..

因為我認為好一般，稍貴之餘亦唔見得好食...

我斷估我應該唔會再去既啦..相信係..

原本我都有影下啲食物既，不過環境太昏暗了..

睇見第一張已經唔駛再睇其他了..呵呵..

此誌純為紀錄今天的聚會..

其實真正原因係..

因為正在等大少回家未瞓才有閒打咁多字..

愛心豐富飯盒

原來尋日係新居入伙的週年日..

不過我今日才突然間想起了呵..

我同大少當然沒有沒有慶祝啦..哈哈..

尋晚大少回來時喝著蕃茄薯仔湯..

突然間發現了心心型的紅蘿蔔呵..

大少︰您駛唔駛呀..

志太︰哎呀..唔關我事嫁..係公主小妹煲嫁..

大少︰您駛唔駛呀..妖!!

志太︰嘻嘻..您影完放上FB比人睇呀..哈哈..

大少︰您都痴孖根嫁..我唔想比人笑呀..

志太︰您寧願我唔開心，定係驚比人笑呀..

大少︰我比人笑會唔開心嫁喎..您係唔係想我唔開心呀..

今天打開我那個豐富的飯盒也有顆小心心呵..

湯‧花膠猴頭菇

我發覺我最近好努力煮飯..

我發覺我最近好愛Le Creuset..

每次煮飯終是會用上其中一個LC..

甚至乎..有時兩個一齊用添呀..

有時後悔廚房只有2個，如果可以多幾個幾好呀..

最可惜是三月開倉時無去到敗..敗..敗..

我要等..等..等到九月開倉吧..嘻嘻..

所以我呢幾個月要更加努力向大少展示..

好讓我可以買個痛快嘛..

每次每次煲湯時我特別想買個大LC回來呵..

涼拌青瓜海蜇雞

這邊廂讓著要減肥..

那邊廂卻又去火鍋..

無辦法啦，大家都咁想打邊爐..

我又可以變孤獨精嫁..於是乎又食啦..

今日星期日瞓得醒來已經下午一點鐘了..

晚餐可以買啲唔識煮既，但自己又想食既..

事關今日媽媽黎左，可以叫佢煮我食嘛..

我家公主小妹指明要食的涼拌青瓜海蜇雞..

嘻嘻..這道所謂係我既名菜呀..大家都愛..

我想食蟹呀..可惜我未整過..

我亦擔心啲蟹會毀於我手上..

所以由媽媽負責，好味道呀!!!

其實睇黎薑蔥炒蟹煮法又並不是很難..

我要嘗試挑戰下..好!!100道新菜色有著落..

好!!等我呀..

我的涼拌青瓜海蜇雞食譜

材料

* 急凍雞脾1隻

* 即食海蜇1包

* 新鮮青瓜1條

其它

* 四季鹽焗雞粉

* 芝麻油適量

* 芝麻適量

煮法

* 雞脾洗淨以鹽焗雞粉醃廿分鐘..

* 將已醃的雞脾隔水蒸廿分鐘取出放涼..

* 將雞脾去皮拆肉撕成絲，雞汁不要倒走..

* 青瓜洗淨以梅花間竹地去綠色的皮(留少少綠色靚啲)..

* 青瓜刨成幼片，以鹽醃10分鐘，渣走多餘的水..

* 將青瓜墊底，中間放上雞脾肉，頂上放上海蜇..

* 在周圍倒入部分雞汁(如果不怕肥就多d，怕肥就少d囉)..

* 在周圍倒入芝麻油，灑上芝麻便可..

* 為了影相靚靚才分三層展示，食時將所有拌食更佳..

不煮‧紅燒豬肉

轉季了..

打開衣櫃無一件衫令我滿意既..

同事朱太又同我講︰我地好似肥左喎..

哎呀..哎呀..我都知道呀..一直逃避..

唉..鬼叫呢個世界上有咁多美味既惡魔..

好食既野總係邪惡既..唉..唉..

我諗我既蔬菜餐又要再次開始了..

我決定今後努力煮多啲大少鍾意我唔鍾意食..

等我可以食得少啲..哈..哈..呵..

至於即係啲咩呢..我仲未諗到喎..

這個送飯一流的菜色，我愛的..不要煮了..

不愛‧乳酪脆脆

天黑黑..

晨早返工已經係天黑黑，攪到好似就黎放工咁樣..

只可惜唔係呀..繼續捱下去..緊接住連場大雨..

好好彩..

放工時已經無咩雨啦喎..真係好..

今晚打算同大少去食"壹蚊雞"..

攞左張飛..等位..要等六十張枱..

噢!!放棄吧啦..睇黎今年無緣食了..

明明上年..上上年都唔係咁既情況嫁..

這個大少不愛的甜品呀..

對話‧金菇牛卷

鈴鈴..鈴鈴..

電話響起..對方傳來可愛小包的聲音..

小包︰喂..喂..

志太︰您係邊個呀..

小包︰小包囉..

志太︰哦..邊個幫您打電話嫁..

小包︰我媽咪囉..

志太︰哦..您有無掛住我呀..

小包︰無喎..

志太︰下..無呀..

小包︰姑丈呢..姑丈係邊呀..

志太︰姑丈返工囉..

小包︰姑丈點解要返工呀..

志太︰返工掙錢囉..

小包︰係呀..姑丈電話打唔通呀..

志太︰係呀..佢返工嘛..

小包︰哎呀..我好掛住佢呀...

...

哎呀!!哎呀!!小包居然話好掛住姑丈..但唔掛住我..

真係太過份啦...

這個金菇肥牛卷是前陣子整的呵..

妹煮給我的

討厭..

我真係好討厭著新鞋..

滿心歡喜的穿上新買的鞋..

卻總是換來皮破血流的結果..

雙腳被刮至紅紅腫腫，被我貼滿了膠布..

真係好討厭呀..不知道何時才可以征服它..

但當到它被我征服後，已經是殘花敗柳了..

我又要再接受另一次的新挑戰了!!真的討厭呀..

男生們看見這樣就只有嘆氣搖頭，唉..唉..

只覺得係我地自己攞苦來辛者..係佢地唔明者..

雙腳仍然隱隱作痛，明天後天大後天要穿回舊鞋了..

晚餐有煎蛋肉醬意粉..好靚呵..

嘻嘻..這是我家妹妹煮給我的晚餐，相是我拍的呵..

炒‧家鄉炒米粉

最近我身邊的人個個都講緊..

係囉..咪係囉..之唔係"盛女愛作戰"囉..

原本我都無睇但身邊個個講緊..

有時我都唔知人地講緊咩喎..

所以假期時我一次過翻睇左五集..

但睇完之後我又唔覺得有咁好睇..

嘻嘻..

睇完之後..起碼我知道咩係45度角呀..

睇完之後..我發現我成日都好快覆短訊..

睇完之後..我發現我成日都係發短訊最後果個..

以後，我要讓自己變成不是最後果個囉..哈哈..

沒有落街，但依然會肚餓的..所以摷出存貨..

存貨可以弄個炒米粉..我同大少的晚餐..

家鄉炒米粉..

煲‧海帶綠豆沙

我家大少好鍾意去波仔買綠豆沙..

一碗好似要十幾蚊架喎，一啲都唔平..

但係我真係一啲都唔覺得好食呀..

但大少依然樂亦不乎地去買黎食..

真係激死我呀!!都唔明點解咁好食!!

所以我決定自己試下煲一煲..

第一次嘗試煲綠豆沙..我知道要落臭草的..

但我臨時決定煲，所以屋企無亦無專登去買..

用LC24cm用左20分鐘去煲既綠豆沙..

問大少覺得好唔好味..佢話同波仔係兩種唔同味道..

唔通因為我無落臭草既原因..會是嗎..

20分鐘煲海帶綠豆沙..

我的海帶綠豆沙食譜

材料

* 綠豆

* 海帶(手掌般)

* 冰糖

* 陳皮小塊(浸軟)

* 水

* 冰(浸豆用)

煮法

* 綠豆洗淨水浸，我早上浸夜晚煮..

* 海帶洗淨水浸，手掌般大便可，因會發大..

* 準備煲前10分鐘將冰塊放入綠豆中，令其急速冷卻..

* 煲滾水，水滾後，取走冰塊，將冰凍綠豆放入滾水中..

* 這樣做綠豆經過冷縮熱漲便很快會起沙了..

* 同時放入陳皮，中火滾起，轉至小火煲10分鐘..

* 海帶切成幼條，放入煲中，再煲10分鐘..

* 最後加入冰糖調味，熄火焗10分鐘便可了..

釀‧竹笙露筍卷

之前買左包竹笙返黎整左竹笙釀冬瓜.

結果仲有包竹笙剩低左，一直放左向殊..

然後比我搵返佢出黎，擺到變左淺啡色..

變左色仲食唔食得既呢..唔好理..浸左佢..

經過浸水及多次既換水，淺啡色亦漸漸褪左..

雖然未至於非常雪白，但我估應該可以食得..

上次切冬瓜釀冬瓜，用左好多時間呀..

今次唔用冬瓜啦，改用露筍，易左好多!!!

滷祖宗‧滷雞翼

昨晚..

大少突然問我︰您兜滷水汁倒左啦..

我有點意外地︰您做咩咁問呀..

大少︰無呀..我見您呢幾日無攪呢啲野..

哎呀..滷味已經連續食左好多日啦喎..

我家大少仍然未覺悶嗎..真係奇怪呀..

係嫁..我家大少對食既要求一向都無咩..

亦唔需要要求多變口味..大少鍾意的..

日日食..餐餐食..差唔多既野都無所謂..

其實這樣我也很舒服..因為大少很容易服侍的..

我有興趣鍾意時可以整我鍾意的新菜色..

我無興趣煮飯時求其整某些食得就可以..

大少之所以想起滷味，佢連食幾日都未厭..

不知是否因為滷祖宗仍未出現..滷祖宗..

係呀..滷水雞翼..我認為係滷味界既滷祖宗..

滷水雞翼..簡直係由細食到大呀..

滷味系列中不能缺少的呵..一於滷一滷呀..

煮‧薑蔥魚腩煲

最近..

我突然間好努力咁煮飯喎..

係喎，突然間又好有動力煮多啲飯..

唔駛出街捱貴野，雖然買餸也很貴呵..

我向大少揚言要煮出100道新菜色既承諾..

不知不覺已經過左一年多了，但只做到一半..

有啲出品仲要有少少"格硬黎"，哈哈..

唔知幾時至會成功完成呢..暗笑中..

其實好多好多野我都未整過嫁，皆因自己懶..

步驟繁複咪攪，唔岩口味無謂，哈哈..

藉口多多..這個薑蔥魚腩煲第一次整..

為左整呢個餸，我仲專登摷返已經封塵既砂煲..

自覺好有茶餐廳風味，好成功，好好味呀..

我的薑蔥魚腩煲食譜

材料

* 鯇魚腩

* 薑片大量

* 蔥段大量

汁料

* 生抽2湯匙

* 蠔油2湯匙

* 糖適量

* 紹酒1湯匙

煮法

* 鯇魚腩洗淨切件抺乾，以生抽及胡椒粉略醃..

* 將已醃的鯇魚腩件沾上粟粉..

* 燒紅鑊下油放入鯇魚腩件以半煎炸式炸熟撈起..

* 燒紅鑊下油放入薑片及蔥段爆香，下魚塊..

* 下汁料[生抽，蠔油，糖]與魚塊同炒便可..

* 砂煲下油放入薑片及蔥段在底，再放入炒好的魚塊..

* 將餘下的蔥段放上面，煲邊灑入紹酒蓋上蓋便可..

我的No.55/100的薑蔥魚腩煲，好成功呀..

想‧三文魚頭湯

某天..

我突然間好想飲魚湯，係奶白色果種魚湯..

之前都煲過魚湯，不過有時唔係好成功..

我有倒入熱水但仍然煲唔出奶白色播..

但既然我想飲..

唯有再接再厲試下，試下自己煲下魚湯..

原本想買小魚黎煲，可惜好遲至去街市..

魚檔已經無咩魚賣啦..突然間見到有三文魚頭..

所以決定煲蕃茄三文魚頭湯..

唔知係唔係今次用左LC煲既關係呢..

真係煲出奶白色既三文魚頭湯呀..

連我家大少都覺得唔錯呀..嘻嘻..

我只係負責飲湯，成個魚頭都係大少吮既!!

我的蕃茄三文魚頭湯食譜

材料

* 三文魚頭1個

* 蕃茄2個

* 豆腐1磚

* 滾水500毫升

* 薑3-4片

煮法

* 三文魚頭去鰓洗淨抺乾..

* 燒紅鑊下油放入薑片爆香，下魚頭煎香三面..

* 下滾水中火煲15分鐘，加入蕃茄件及豆腐件..

* 滾起轉小火煲20分鐘下鹽便可..

又再滷‧滷豆腐

復活節假期返工第一天..

可能因為過左四日假期既關係，今日真係忙到癲呀..

不過諗落有得忙，都總好過無得忙呀呵..

如果公司無得忙就死得啦呵..呵..呵..

對不起，今天仍然繼續係我既滷味系列呀..

滷味真係好簡單快捷，又岩晒我家大少既胃口..

原本大少叫我滷豬腸啦，但我拒絕左佢..下次先啦..

滷左款大少唔食既野..豆腐..哈哈!!!

豆腐不是靠煮的，而是靠浸就得既啦..

日日都滷味，我真係覺得好悶啦..

所以滷水汁要入冰箱了，暫時不滷了..

我的滷豆腐食譜

材料

* 炸豆腐4磚

滷水料

* 滷水包1包

* 清水1200毫升

* 生抽200毫升

* 老抽200毫升

* 冰糖2大塊

* 生薑2大塊

* 蒜頭連衣半個

# 其實咪依然係果煲#

煮法

* 炸豆腐放入已滾水中出水，去除部分的油撈起備用..

* 將滷水料滾起，放入炸豆腐，水滾起轉小火煮3分鐘..

* 熄火讓豆腐浸在汁中1小時..

* 食時取出切片便可...